پاۆلودار وبلىسىندا جالعان اقپارات بەرگەن ءجاسوسپىرىمنىڭ اتا-اناسى جاۋاپقا تارتىلدى، دەپ حابارلايدى aqshamnews.kz
«102» ارناسىنا قوبالجىعان داۋىسپەن حابارلاسقان قىز بىرنەشە مينۋت بۇرىن 13 جاستاعى باۋىرى قوڭىراۋ شالىپ، «بەلگىسىز ادامدار ونى قارا دجيپپەن الىپ كەتىپ، ۇرىپ-سوعىپ جاتىر» دەپ ايتقان. وسىدان كەيىن ونىڭ تەلەفونى ءوشىپ قالعان.
ءجاسوسپىرىمنىڭ تۋىستارى ونىڭ جاتتىعۋعا بارۋى كەرەك ەكەنىن ايتقان. قۇقىق قورعاۋ ورگاندارى جاعدايدىڭ كۇردەلىلىگىن ءتۇسىنىپ، دەرەۋ اتامەكەن كەنتىنە باردى. تەز ارادا ىزدەستىرۋ شارالارى ۇيىمداستىرىلىپ، تۋىستارىمەن، كورشىلەرىمەن جانە كەنت تۇرعىندارىمەن سۇحبات جۇرگىزىلدى.
ءبىراز ۋاقىتتان كەيىن كامەلەتكە تولماعان بالا ۇيگە اۋلا ارقىلى كىرىپ كەلگەندە، پوليسيا مەن اتا-انالاردى اڭ-تاڭ قالدىردى. ءجاسوسپىرىمنىڭ ايتۋىنشا، ول ءىشىنىڭ پىسىپ، اتا-اناسى مەن اپكەسىن الداۋ ءۇشىن ءوزىن «ۇرلادى» دەگەن جالعان اقپارات ويلاپ تاپقان.
وقيعاعا بايلانىستى ءجاسوسپىرىمنىڭ اتا-اناسىنا 30 اەك كولەمىندە ايىپپۇل سالىندى. پوليسيا دەپارتامەنتىنىڭ وكىلى:
– بۇل وقيعا مەن جازا ءجاسوسپىرىم مەن ونىڭ وتباسى ءۇشىن ماڭىزدى ساباق بولادى دەپ ۇمىتتەنەمىز. مۇنداي جالعان قوڭىراۋلار تەك قورقىنىش تۋدىرىپ قانا قويماي، قىزمەتتەردىڭ جۇمىسىن قيىنداتىپ، شىنايى كومەك قاجەت ەتەتىن ادامدارعا كەدەرگى كەلتىرۋى مۇمكىن، – دەپ اتاپ ءوتتى.
قۇقىق قورعاۋ ورگاندارى ازاماتتاردى جالعان قوڭىراۋ شالىپ، قىزمەتتەردى الداۋدان ساقتانۋعا شاقىردى. مۇنداي ازىلدەر جەدەل جاردەم رەسۋرستارىنا ءقاۋىپ ءتوندىرىپ، قوعامدىق ءتارتىپتى ساقتاۋعا كەرى اسەرىن تيگىزەدى. زاڭ بۇزۋشىلىقتارعا ەشكىمنىڭ كوز جۇمۋىنا جول بەرىلمەيدى، سەبەبى «زاڭ جانە ءتارتىپ» قاعيداسى ازاماتتاردىڭ قاۋىپسىزدىگى ءۇشىن باستى نەگىز بولىپ تابىلادى.