قازاقستاننىڭ توتەنشە جاعدايلار ءمينيسترى، گەنەرال-مايور شىڭعىس ءارىنوۆ الماتىعا جۇمىس ساپارى بارىسىندا «قازسەلدەنقورعاۋ» مەملەكەتتىك مەكەمەسىنىڭ الماتى فيليالىندا بولدى، دەپ حابارلايدى aqshamnews.kz
مينيستر مەكەمەنىڭ قىزمەتىمەن تانىسىپ، ءبىرقاتار نىسانداردى، سونىڭ ىشىندە ورتالىق ديسپەچەرلىك پۋنكتتى، اۆتوموبيلدەر مەن ارنايى تەحنيكالاردىڭ جاعدايىن تەكسەردى. ساپار اياسىندا شىڭعىس ءارىنوۆ «قازسەلدەنقورعاۋ» قىزمەتكەرلەرىمەن بىرگە كوشكىن جاعدايىنا مونيتورينگ جۇرگىزىپ، اەروۆيزۋالدى بارلاۋ ۇيىمداستىردى. بۇل شارا بارىسىندا قار كوشكىندەرىنىڭ الدىن الۋ ءۇشىن ورناتىلعان جاڭا جابدىققا ەرەكشە نازار اۋدارىلدى.
مينيسترگە «DaisyBell» ءموبيلدى قار كوشكىنىنە قارسى جۇيەسى تانىستىرىلىپ، سىناقتان ءوتتى. بۇل قوندىرعى تىكۇشاققا كابەل ارقىلى بەكىتىلگەن مەتالل كونۋس بولىپ تابىلادى. ونىڭ جۇمىس ءپرينسيپى – كونۋستاعى ازوت-سۋتەگى قوسپاسىن قاشىقتان جارۋ ارقىلى قار كوشكىنىنىڭ ءتيىمدى ءتۇسۋىن قامتاماسىز ەتۋ. اتالعان جۇيە ەۋروپا ەلدەرىندە، سونىڭ ىشىندە رەسەيدە كەڭىنەن قولدانىلىپ كەلەدى جانە جەرگىلىكتى كليماتتىق جاعدايلاردا ونىڭ تيىمدىلىگىن باعالاۋ ءۇشىن قازاقستاندا سىناقتان وتۋدە.
«قازاۆياقۇتقارۋ» اق تىكۇشاعى ارقىلى جۇرگىزىلگەن بارلاۋ كەزىندە «DaisyBell» جۇيەسى ۇلكەن جانە كىشى الماتى وزەندەرىنىڭ كوشكىن ءقاۋپى بار ايماقتارىندا قار كوشكىندەرىن الدىن الۋ شارالارىندا قولدانىلدى. شىڭعىس ءارىنوۆ جاڭا تەحنولوگيالاردى قار كوشكىنىنىڭ الدىن الۋ جۇمىستارىندا بەلسەندى قولدانۋ قاجەتتىگىن اتاپ ءوتىپ، ءتيىستى تاپسىرمالار بەردى.
قازاقستاندا قار كوشكىنى – ادامداردىڭ ومىرىنە ءقاۋىپ توندىرەتىن ەڭ ءقاۋىپتى تابيعي قۇبىلىستاردىڭ ءبىرى. ەلىمىزدە كوشكىن ءقاۋپى بار 619 ۋچاسكە بار، ونىڭ 165ء-ى الماتى قالاسىندا ورنالاسقان. جىل سايىن «قازسەلدەنقورعاۋ» شامامەن 150 پروفيلاكتيكالىق قار كوشكىنىن ءتۇسىرۋدى جۇزەگە اسىرادى. 2024-2025 جىلدارداعى قىسقى ماۋسىمدا 15 پروفيلاكتيكالىق ءتۇسىرۋ جۇرگىزىلىپ، جالپى كولەمى 6665 م³ قار شىعارىلعان.
«قازگيدرومەت» رمك مالىمەتى بويىنشا، 2025 جىلدىڭ قاڭتار جانە اقپان ايلارىندا تاۋلى ايماقتاردا جوعارى تەمپەراتۋرا مەن مول جاۋىن-شاشىن بولۋى مۇمكىن، بۇل قار كوشكىندەرىنىڭ ءقاۋپىن ارتتىرادى. وسى جاعدايدى ەسكەرە وتىرىپ، كوشكىندەردىڭ الدىن الۋ جۇمىستارى جالعاسۋدا.