2025 جىلدىڭ 1 قاڭتارىنان باستاپ بىرىككەن اراب امىرلىكتەرىندە (ءباا) نەكەگە تۇرۋدى جوسپارلاعان جۇپتار ءۇشىن گەنەتيكالىق تەستىلەۋدەن ءوتۋ مىندەتتەلدى. بۇل شەشىم بولاشاق ۇرپاقتىڭ دەنساۋلىعىن قامتاماسىز ەتۋ جانە تۇقىم قۋالايتىن اۋرۋلاردىڭ الدىن الۋ ماقساتىندا قابىلدانعان، دەپ حابارلايدى aqshamnews.kz
ءباا ۇكىمەتىنىڭ مالىمەتىنشە، تەستىلەۋ 570-تەن استام گەندىك مۋتاسيا مەن 840-قا جۋىق اۋرۋدى انىقتاۋعا مۇمكىندىك بەرەدى. ولاردىڭ ىشىندە ەپيلەپسيا، مۋكوۆيسيدوز جانە جۇرەك پاتولوگيالارى سەكىلدى تۇقىم قۋالايتىن اۋرۋلار بار.
پيلوتتىق جوبا ناتيجەسىندە، تەستتەن وتكەن جۇپتاردىڭ 86%-ى گەنەتيكالىق تۇرعىدان ۇيلەسىمدى دەپ تانىلسا، 14%-ىنا قوسىمشا مەديسينالىق كەڭەس بەرۋ ۇسىنىلعان. سونىمەن قاتار، سكرينينگكە ۆيچ، گەپاتيتتەر، مەرەز جانە باسقا دا ينفەكسيالىق اۋرۋلارعا تەستىلەۋ ەنگىزىلگەن.
ءباا تاجىريبەسى قوعامدا تۇقىم قۋالايتىن اۋرۋلاردى ازايتۋعا جانە دەنى ساۋ ۇرپاق تاربيەلەۋگە سەپتىگىن تيگىزەدى. قازاقستاندا دا وسىنداي باستامانى ەنگىزۋ قاجەت پە؟ ءسىز قالاي ويلايسىز؟