جابىق جولعا شىقپاۋ جونىندەگى ەسكەرتۋلەرگە قۇلاق اسپاعاندار قوماقتى ايىپپۇل تولەيدى

قاڭتار ايىنىڭ باسىندا كوپتەگەن وڭىردە اۋا رايى ناشارلاپ، توعىز وبلىستا اۆتوجولدار جابىلدى.

بۇل تۋرالى ق ر ىشكى ىستەر مينيسترلىگىنىڭ وكىلى شۇعىلا تۇرلىبەك ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«ەڭ قيىن كۇندەر 3 جانە 4 قاڭتاردا بولدى، قار، قاتتى جەل، بوران بولىپ، كورۋ ناشارلادى. ەلىمىزدىڭ 9 وڭىرىندە رەسپۋبليكالىق جانە وبلىستىق ماڭىزى بار اۆتوجولداردىڭ 79 ۋچاسكەسىندە كولىك قوزعالىسىنا شەكتەۋلەر ەنگىزىلدى. جولداردا تج جويۋ جونىندەگى رەسپۋبليكالىق شتاب قۇرىلدى»، - دەدى ىشكى ىستەر مينيسترلىگىنىڭ وكىلى اپتالىق ونلاين بريفينگىدە.

ش. تۇرلىبەكتىڭ ايتۋىنشا، ەۆاكۋاسيالاۋ ءۇشىن 769 ۋاقىتشا جىلىتۋ پۋنكتى دايىندالدى.

اپاتتان قۇتقارۋ جۇمىسىنا 4 مىڭنان استام ادام جانە 1،5 مىڭ تەحنيكا جۇمىلدىرىلدى.

«جەكە جۇرگىزۋشىلەر پوليسيانىڭ جولداعى قوزعالىس شەكتەۋلەرىن ەلەمەي، قولايسىز اۋا رايىندا ءقاۋىپتى ۋچاسكەلەرگە شىعىپ، وزدەرىنە جانە جولاۋشىلارىنا ءومىر مەن دەنساۋلىققا ءقاۋىپ توندىرەدى. كوپ جاعدايدا ولاردىڭ كولىگى قار قۇرساۋىندا قالادى جانە ولاردى قۇتقارۋ ءۇشىن پوليسيا مەن تج قىزمەتكەرلەرى تاۋەكەلگە بارىپ، رەسۋرستاردى جۇمساۋعا ءماجبۇر بولادى. كولىك جۇرگىزۋشىلەرى جابىق جولدارعا شىقپاۋ جونىندە پوليسيانىڭ زاڭدى تالاپتارىنا باعىنباعان جاعدايلاردا، ولارعا 30 اەك نەمەسە 103 500 تەڭگە ايىپپۇل، 15 تاۋلىككە دەيىن اكىمشىلىك قاماققا الۋ تۇرىندە اكىمشىلىك جاۋاپكەرشىلىك قارالعانىن ەسكەرتەمىز»، - دەدى سپيكەر.

اۋا رايى جاعدايى ناشارلاعان جاعدايدا جولدارداعى جاعداي حالىققا سمس-تاراتۋ، ينتەرنەت-ارنالار جانە تەلەراديو حابارلارى ارقىلى الدىن الا جەتكىزىلەدى.

ىشكى ىستەر مينيسترلىگى ازاماتتارعا جولداعى جاعدايدى الدىن الا بىلۋگە كەڭەس بەرەدى.

اۋا رايىنىڭ ناشارلاۋىنا بايلانىستى جابىق ۋچاسكەلەر تۋرالى سەنىمدى اقپاراتتى 112، 102 تەلەفوندارى، سونداي-اق «قازاۆتوجول» ۇك» اق بايلانىس ورتالىعىنان 1403 تەلەفونى بويىنشا بىلۋگە بولادى.