جوعالعان جىگىتتىڭ قاي باعىتقا كەتكەنىن ەشكىم كورمەگەن
اتىراۋ وبلىسىندا ءىز-تۇزسىز جوعالعان 24 جاستاعى جىگىتتى ىزدەۋ توقتاتىلدى. ويتكەنى، 20 قاراشادان بەرى جۇرگىزىلگەن ىزدەستىرۋ جۇمىستارى ناتيجە بەرمەدى. اتىراۋ وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبى ءمالىم ەتكەندەي، 24 جاستاعى جىگىت 20 قاراشادا ءىز-تۇزسىز جوعالىپ كەتكەن، دەپ حابارلايدى Almaty-akshamy.kz.
قىزىلقوعا اۋدانىنداعى جامبىل اۋىلدىق وكرۋگىنە قارايتىن قاراكول اۋىلىندا تۇرعان جىگىت ساعات 5:00-دە ۇيىنەن شىعىپ كەتكەن. سودان بەرى ودان ەش دەرەك بولماي تۇر.
جوعالعان جىگىتتىڭ قاي باعىتقا كەتكەنىن ەشكىم كورمەگەن. العاشقى كۇنى ونى ىزدەستىرۋگە توتەنشە جاعدايلار دەپارتامەنتى مەن قىزىلقوعا اۋداندىق پوليسيا بولىمىنەن، جەرگىلىكتى اتقارۋشى ورگان مەن تۋىستارىنان 37 ادام تارتىلعان. ىزدەۋ جۇمىستارى ءتورت كۇن قاتارىنان جۇرگىزىلىپ، كەيىن توقتاتىلعان.
«حابار-وشارسىز كەتكەن جىگىتتى ىزدەۋ ءۇشىن 30 قاراشادا جەرگىلىكتى ۋاقىتپەن ساعات 9:52-دە «قازاۆياقۇتقارۋ» اق-نىڭ «ەۆروكوپتەر» تىكۇشاعى تارتىلعان ەدى. تىكۇشاق بورتىندا 7 ادام بولدى. ءبىراق، اۋەدەن بارلاۋ ارقىلى ىزدەۋ ەش ناتيجە بەرگەن جوق»، – دەپ حابارلادى دەپارتامەنتتىڭ قوعاممەن بايلانىس توبىنان.
قۇتقارۋشىلار جوعالعان جىگىتتى جازىق دالادان، ساي-جىرالاردان، قاراۋسىز قالعان قىستاقتار مەن وزگە دە جەرلەردەن ىزدەستىردى. ءبىراق، ناتيجە بولماعاندىقتان، ىزدەۋ جۇمىستارى توقتاتىلدى. ەندى قايتا جالعاسا ما، جوق پا، ازىرگە بەلگىسىز.