وقيعا ورنىندا مۇلىككە كەلگەن زالالدى باعالايتىن كوميسسيا جۇمىس ىستەپ جاتىر.
ق ر توتەنشە جاعدايلار ءمينيسترى يۋريي يلين ب ا ق وكىلدەرىنە جامبىل وبلىسىنداعى جارىلىس سالدارىن جويۋ ءۇشىن قانشا كۇن كەرەك ەكەنىن ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«بۇگىنگى تاڭدا ەكى قويمادا بىقسىپ جاتقان وشاقتار بار. وسى ماسەلە بويىنشا جينالىس وتكىزدىك. قورعانىس مينيسترلىگىنىڭ ساپەرلەرى مەن ءورت ءسوندىرۋ قىزمەتى اتالعان وشاقتاردا جۇمىس ىستەپ جاتىر. جارىلماي قالعان وق-دارىلەر بار. توتەنشە جاعدايلار مينيسترلىگىنىڭ بولىمشەلەرى بىقسىپ جاتقان وشاقتاردى ءوشىرۋ ءۇشىن سۋ تاسىپ، ەۆاكۋاسيالانعان تۇرعىنداردى ۇيلەرىنە قايتارۋمەن اينالىسىپ ءجۇر. وقيعا ورنىندا مۇلىككە كەلگەن زالالدى باعالايتىن كوميسسيا جۇمىس ىستەپ جاتىر. مەنىڭشە، جاقىن كۇندەرى ولار قيراعان مۇلىكتى قالپىنا كەلتىرۋگە كىرىسەدى. ءقاۋىپ تولىق سەيىلمەگەنىن ەسكەرسەك، وقيعانىڭ ەپيسەنترىندە قايتا جارىلىس بولۋى مۇمكىن. تەمىرجول بويىنشا جۇك تاسىمالى توقتاپ تۇر. ال جولاۋشىلار تاسىمالى بۇگىن شەشىلۋى كەرەك دەپ ويلايمىن»، - دەگەن مينيستر ءالى دە اسىعۋعا بولمايتىنىن ءتۇسىندىردى.
«مۇنىڭ ءبارى جالپى احۋالعا بايلانىستى. ويتكەنى قيراندىلاردى ارشىپ، تازارتۋ ءۇشىن ءبىراز ۋاقىت كەرەك، كوپ شىعىن كەتەدى. وندا وق-دارىمەن جۇمىس ىستەپ جاتقان ساپەرلەردىڭ اماندىعى ماڭىزدى ەكەنىن تۇسىنەتىن شىعارسىزدار. بەتىن ءارى قىلسىن، اسىعىستىق جاساپ، ولاردى قاۋىپكە يتەرمەلەي المايمىز. جارىلىستىڭ سالدارىن تولىق جويۋ ءۇشىن ارنايى جۇمىس توبىمەن، اكىمدىكپەن، قورعانىس مينيسترلىگىمەن بىرلەسە وتىرىپ، تاعى ەكى-ۇش كۇن جۇمىس ىستەۋ قاجەت بولادى دەپ ويلايمىن»، - دەدى يۋريي يلين ب ا ق وكىلدەرىنە.