20 اقپان كۇنى الماتىدا توقتابايەۆ پەن سۇلەيمەنوۆ كوشەلەرىنىڭ قيىلىسىندا جينالعان ءبىر توپ ادام ايقايلاپ، قاۋىپسىزدىك قىزمەتكەرلەرىن ۇرىپ-سوققان. مۇنى كورگەن تۇرعىندار ۇرەيلەنىپ، سول ماڭنان تەزىرەك كەتۋگە تىرىسقان. وسىعان بايلانىستى جەرگىلىكتى بيلىك جاعدايدى ءتۇسىندىردى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
ونىڭ ۆيدەوسى الەۋمەتتىك جەلىدە تارادى.
بەينەجازبادان ءبىر توپ ادامنىڭ كوشەنىڭ ورتاسىندا كەلە جاتقانىن كورۋگە بولادى. ولاردىڭ قولىندا تەمىر قالقان مەن تاياق بولدى.
ال مۇنداي قورقىنىشتى كورىنىستى كورگەن تۇرعىندار شوشىپ كەتتى. جۇرگىزۋشىلەر جول ەرەجەسىن بۇزىپ، سول ماڭنان تەزىرەك كەتۋگە اسىقتى.
كەيىننەن مۇنىڭ ءبارى ءتۇسىرىلىم ءۇشىن جاسالعانى انىقتالدى.
الايدا «Cultburo» ج ش س قاڭتار ايىنداعى وقيعالار تۋرالى روليك تۇسىرۋگە رەسمي رۇقسات الماعان.
اكىمدىكتىڭ باسپا ءسوز قىزمەتىنىڭ مالىمەتىنشە، 1 اقپاندا الماتى قالاسى اكىمىنىڭ، اۋەزوۆ اۋدانى اكىمىنىڭ جانە پوليسيا دەپارتامەنتىنىڭ اتىنا «Cultburo» جشس-نەن 13 اقپاندا «حابار» تەلەارناسىنىڭ تاپسىرىسى بويىنشا قاڭتارداعى وقيعالار تاقىرىبىنا الەۋمەتتىك روليك تۇسىرۋگە رۇقسات بەرۋ تۋرالى ءوتىنىش كەلىپ تۇسكەن.
اتالعان ءوتىنىش بويىنشا قوعامدىق دامۋ باسقارماسىنىڭ ماماندارى ءوتىنىش اۆتورلارىمەن ءتۇسىندىرۋ جۇمىستارىن جۇرگىزدى جانە ولاردى ءتۇسىرىلىم جۇرگىزۋگە رۇقسات بەرىلمەگەنى تۋرالى حاباردار ەتتى. پوليسيا دەپارتامەنتىنەن دە ەش رۇقسات بەرىلمەگەن.
الايدا، روليك تۇسىرۋگە تىيىم سالىنعانىنا قاراماستان، «Cultburo» ج ش س اعىمداعى جىلدىڭ 20 اقپانىندا بەينەروليك تۇسىرگەن.