يۋليا پۋتينسيەۆا رابات جارىسىنىڭ جارتىلاي فينالىنا وتە المادى

سپورتشىلار كەزدەسۋدى برەيك الماسۋمەن باستادى

قازاقستاننىڭ ەكىنشى، الەمنىڭ 61-راكەتكاسى يۋليا پۋتينسيەۆا رابات (ماروككو) WTA 250 ءتۋرنيرىنىڭ جارتىلاي فينالىنا وتە المادى، دەپ حابارلايدى Almaty-akshamy.kz قازاقپاراتقا سىلتەمە جاساپ.

قازاقستاندىق تەننيسشى شيرەك فينالدا دۇنيەجۇزىلىك رەيتينگتە 195-ورىندا تۇرعان ارگەنتينالىق، 20 جاستاعى يۋليا ريەرامەن كورتقا شىقتى.

سپورتشىلار كەزدەسۋدى برەيك الماسۋمەن باستادى. ەسەپ 5:5 بولعان مەزەتتە پۋتينسيەۆا تاعى ءبىر برەيككە قول جەتكىزىپ، ءوز گەيمىن دە الدى – 7:5.

ەسەسىنە ەكىنشى پارتيادا يۋ.ريەرا ساتتىرەك ويناپ، سەتكە دوپ بەرگەندە، ءوز مۇمكىندىگىن پايدالانباعانىمەن، تاعى ءبىر برەيك جاساپ كەتتى – 6:4.

ءۇشىنشى، شەشۋشى سەتتى ارگەنتينالىق تەننيسشى برەيكپەن باستادى – 2:0. ماچتى دا برەيكپەن ءتامامدادى – 6:2.

ەكى ساعات جارىمعا جۋىق ۋاقىتقا سوزىلعان تارتىستى باسەكە بارىسىندا پۋتينسيەۆا 10 برەيك-پوينتتىڭ تەڭ جارتىسىن عانا پايدالاندى. قارسىلاسى 1 ەيس، 7 برەيكپەن (19 برەيك-پوينت) كوزگە ءتۇستى.

يۋ.ريەرا فينالعا شىعۋ ءۇشىن رەيتينگتە 74-ساتىداعى اۋستريالىق دجۋليا گرابەرمەن تالاسادى. ول جارىستىڭ ءبىرىنىش، الەمنىڭ 26-راكەتكاسى، يتاليالىق مارتينا تريەۆيزاندى جولدان تايدىردى. ەسەپ 3:6 بولىپ، ءبىرىنشى پارتيا بىتكەننەن كەيىن يتاليالىق تەننيسشى باسەكەنى جالعاستىرۋدان باس تارتتى.