الداعى كۇندەرى رەنن مەن پاريجدە ۇلى اقىننىڭ شىعارماشىلىعىنا ارنالعان ءىس-شارالار وتەدى
قازاقستاننىڭ پاريجدەگى ەلشىلىگىندە اباي قۇنانباي ۇلىنىڭ «جەلسىز تۇندە جارىق اي» شىعارماسىنا ارنالعان قىسقا مەتراجدى انيماسيالىق ءفيلمنىڭ پرەمەراسى ءوتتى، دەپ حابارلايدى Almaty-akshamy.kz El.kz-كە سىلتەمە جاساپ.
«MPL Culture» كومپانياسىنىڭ قولداۋىمەن «قازاقستاننىڭ فرانسياداعى ايەلدەرى» قوعامداستىعى ۇيىمداستىرعان ءىس-شاراعا شەت مەملەكەتتەردىڭ ەلشىلەرى، ساياسي، اكادەميالىق، مادەني جانە ىسكەر توپتاردىڭ وكىلدەرى قاتىستى.
انيماسيالىق ءفيلمدى انگۋلەم قالاسىندا وقيتىن دومينيكا قىدىربايەۆانىڭ جەتەكشىلىگىمەن فرانسۋز-قازاقستاندىق ستۋدەنتتەردىڭ كرەاتيۆتى توبى جاسادى. مادەني ءىس-شارانىڭ اياسىندا عازيزا عابدراحيموۆا قازاق كومپوزيتورلارىنىڭ شىعارمالارىن ەجەلگى قوبىز اسپابىندا ورىندادى.
سونىمەن قاتار، الداعى كۇندەرى رەنن مەن پاريجدە ۇلى اقىننىڭ شىعارماشىلىعىنا ارنالعان ءىس-شارالار وتەدى. وسى قالالاردا ورناتىلعان اباي ەسكەرتكىشتەرىنىڭ جانىندا جينالىپ، قازاقستاندىقتار مەن ونىڭ شىعارماشىلىعىن سۇيەتىن فرانسۋز ازاماتتارى ۇلى بابامىزدى ەسكە الىپ، ولەڭدەرىن وقيدى.