گالىشيەۆا وليمپيادا ويىندارىندا 11ء-شى ورىن الدى
بەيجىڭ وليمپياداسىندا فريستايل-موگۋلدان ايەلدەر اراسىنداعى ەكىنشى فينال اياقتالدى، دەپ حابارلايدى Almaty-akshamy.kz Olympic.kz-كە سىلتەمە جاساپ.
اتالعان سىنعا قازاقستان كومانداسىنىڭ ۇزدىگى يۋليا گالىشيەۆا دا قاتىسقان. وكىنىشكە قاراي، ول جارىس جولىندا قاتە جىبەرىپ، قورىتىندى ەسەپتە نەگىزگى فينالدان تىس قالدى.
ول 49،74 ۇپايمەن بيىلعى وليمپيادا ويىندارىندا 11ء-شى ورىن الدى.
ايتا كەتەلىك، بۇگىن الەم ۇزدىكتەرىنىڭ ءبىرقاتارى جارىس جولىندا قۇلاپ قالدى. 2014 جىلعى وليمپيادا چەمپيونى، 2018 جىلعى پحەنچحان ويىندارىنىڭ كۇمىس جۇلدەگەرى جيۋستين ديۋفۋر-لاپۋانت تا بەيجىڭ دوداسىن جۇلدەسىز اياقتادى.
ايتا كەتەلىك، 2018 جىلعى قىسقى ويىنداردا يۋليا گالىشيەۆا قولا جۇلدەگەر اتانعان بولاتىن.