بەرليندەگى كورمە 2 ايعا سوزىلادى
گەرمانيا استاناسىندا قازاقستاندىق تانىمال سۋرەتشى باقىتنۇر بۇردەسبەكوۆتىڭ كورمەسى اشىلدى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
شاراعا مادەنيەت قايراتكەرلەرى، قازاقستاندىق ديپلوماتتار مەن شەتەلدىك كوللەكسيونەرلەر قاتىستى. كورمەگە قىلقالام شەبەرىنىڭ 30-عا جۋىق ەڭبەگى قويىلدى.
ايتا كەتەيىك، بۇل باقىتنۇر بۇردەسبەكوۆتىڭ شەتەلدە وتكەن العاشقى كورمەسى ەمەس. ونىڭ كارتينالارى ءار جىلدارى فرانسيا، تۇركيا، جاپونيا جانە اقش تۇرعىندارىنىڭ نازارىنا ۇسىنىلعان بولاتىن. بەرليندەگى كورمە 2 ايعا سوزىلادى. ءقازىردىڭ وزىندە بىرنەشە سۋرەت ساتىلىپ كەتكەن.
«ادەتتە ادام قىمبات تۋىندىنى تاڭداعاندا بىرنەشە اي، بىرنەشە كۇن، تىم قۇرىعاندا، جارتى كۇن، بىرنەشە ساعات ويلانادى. ءبىر ايەل ادام سۋرەتتى 10 مينۋت قارادى دا ساتىپ الۋعا بىردەن شەشىم قابىلدادى. ول بۇل كارتيناعا ءبىر كورگەننەن عاشىق بولىپ قالدى دەسەم قاتەلەسپەسپىن. بۇل مەن ءۇشىن دە ۇلكەن ابىروي. سەبەبى كورمەنىڭ تەككە ۇيىمداستىرىلماعانىنا كوز جەتكىزەسىز. ساتىپ الۋشىلار عانا ەمەس، ونەردىڭ باعاسىن بىلەتىن ادامدار دا كوپتەپ كەلىپ جاتىر. ولار "و، كەرەمەت كورمە ءوتىپ جاتىر" دەيدى»،-دەپ اتاپ ءوتتى «ARS PRO DONO» گالەرەياسىنىڭ نەگىزىن قالاۋشى الەكسەي شراينەر.