جەنيەۆا قالاسىندا وتكەن الەم چەمپيوناتىندا مويىندالماعان تۇقىمدار توبىندا (FCI حالىقارالىق كينولوگيالىق فەدەراسيانىڭ 11-توبى) قازاقتىڭ ەكى تازىسىنا ەڭ جوعارعى تيتۋلدار بەرىلدى، دەپ حابارلايدى Almaty-akshamy.kz.
«سترانا بەلوۆوديا» (شقو) ءتالىمباعىنان شىققان «تۇمار» ەسىمدى تازى «تۇقىمنىڭ ۇزدىك وكىلى» جانە «جەنيەۆاداعى الەم كۋبوگىنىڭ جەڭىمپازى» اتاقتارىنا لايىق تانىلدى. وسى ءتالىمباقتان شىققان ەكىنشى يت «ۆانگەليا» دا بىرنەشە تيتۋلعا يە بولدى، اتاپ ايتقاندا «قارسى جىنىستىڭ ۇزدىك وكىلى» جانە «جەنيەۆاداعى الەم كۋبوگىنىڭ ۇزدىك ارداگەرى» اتاندى.
قازاقستان كينولوگتەرى وداعىنداعى ۇلتتىق تازى كلۋبىنىڭ باسشىسى ەلەنا حاردينا بۇل جەڭىسكە 2006 جىلدان بەرى تالپىنىپ كەلە جاتقاندارىن ايتادى.
«مەنىڭ مىندەتىم مىقتى جانە ساۋ تازىلاردى شىعارۋ، ولارمەن بارلىق حالىقارالىق كورمەلەرگە قاتىسۋ بولدى، ونداعى ماقسات – ءبىزدىڭ تۇقىمدى الەمنىڭ ءار جەرىندە كورسەتۋ»، - دەيدى ول.
ايتۋىنشا، ءبىزدىڭ يتتەرگە رەسەيدەن شىعىپ، يتاليادا تۇرىپ جاتقان تازىلار باسەكەلەس بولعان.
«وسى جەنيەۆاداعى باسەكەلەستەرىمىز وسال بولمادى، تولقىدىق. ءبىراق، ءبىز جەڭدىك! وتە قۋانىشتىمىز، سەبەبى تازىنىڭ وتانى – قازاقستاننان شىققان يتتەر جەڭىلۋى مۇمكىن ەمەس. ءبىز الداعى ۋاقىتتا دا جەڭىس تۇعىرىندا بولۋىمىز كەرەك. 2016 جىلعى الەم چەمپيوناتىندا جەڭگەنبىز، ول كەزدە بەلارۋستىك تازىلارمەن باسەكەلەستىك»، - دەيدى ە. حاردينا.
كينولوگ جەنيەۆادا تازىلارعا دەگەن قىزىعۋشىلىق جوعارى بولعانىن ايتادى.
«كورمەنى تاماشالاۋعا كەلگەندەردىڭ كوبى جانىمىزعا كەلىپ، يتتەرىمىز تۋرالى سۇراپ، فوتوعا ءتۇسىپ جاتتى. قىزىعۋشىلىق جوعارى بولدى»، - دەپ اتاپ ءوتتى ول.
ايتا كەتسەك، شۆەيساريادا تۇراتىن قازاقستاندىق قاۋىمداستىق وكىلدەرى دەلەگاسياعا قولداۋ ءبىلدىرۋ ءۇشىن كەلدى.
