يتبالىقتاردىڭ پوپۋلياسياسىن ساقتاۋ - ماڭىزدى ماسەلە.
كاسپيي تەڭىزىندە مەملەكەتتىك تابيعي رەزەرۆات قۇرۋ جۇمىستارى جۇرگىزىلىپ جاتىر. بۇل تۋرالى بۇگىن ۇكىمەت وتىرىسىندا ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كاسپيي يتبالىقتارىنىڭ پوپۋلياسياسىن ساقتاۋ - ماڭىزدى ماسەلە. پرەزيدەنتتىڭ تاپسىرماسىنا سايكەس، كاسپيي تەڭىزىندە مەملەكەتتىك تابيعي رەزەرۆات قۇرۋ جۇمىستارى جۇرگىزىلىپ جاتىر. بۇگىنگى تاڭدا تابيعي-عىلىمي نەگىزدەمە ازىرلەنۋدە. ونى كەلەسى جىلدىڭ قاڭتارىندا الۋدى جانە ودان ءارى تەحنيكالىق-ەكونوميكالىق نەگىزدەمە ازىرلەۋگە كىرىسۋدى جوسپارلاپ وتىرمىز»، - دەدى مينيستر بالىق سالاسىن دامىتۋ باعدارلاماسىنىڭ بيىلعى قورىتىندىسىن بايانداي كەلە.
ونىڭ ايتۋىنشا، مەملەكەت باسشىسىنىڭ بالىق شارۋاشىلىعى ماسەلەلەرى جونىندەگى تاپسىرمالارىن ورىنداۋ ءۇشىن جانە جاڭا وبلىستاردىڭ قۇرىلۋىنا بايلانىستى بالىق شارۋاشىلىعىن دامىتۋ باعدارلاماسىنا تۇزەتۋلەر ەنگىزۋ كەرەك.
«سونىمەن قاتار سۋ تاپشىلىعى مەن الەمدىك نارىقتارداعى احۋال بويىنشا اعىمداعى جاعدايدى ەسكەرە وتىرىپ، ينديكاتورلاردى وزەكتەندىرۋ قاجەت. بۇل جۇمىستى بيزنەس جانە عىلىم وكىلدەرىمەن بىرلەسىپ جۇرگىزەمىز. مەملەكەتتىك ورگاندارمەن كەلىسىلگەننەن كەيىن، ۇكىمەت قاۋلىسىنىڭ ءتيىستى جوباسى كەلەسى جىلدىڭ ەكىنشى توقسانىندا ەنگىزىلەتىن بولادى»، - دەدى ول.