قازاقستاندىق دەلەگاسيا دۇنيەجۇزىلىك بانكتىڭ شاقىرۋىمەن وڭتۇستىك كورەياعا بارىپ، قوعامدىق كولىك پەن اقىلدى تەحنولوگيالار جۇمىسىمەن تانىستى.
قوناقتار جۇرگىزۋشىسىز جۇرەتىن تاكسيگە وتىرىپ كوردى. سەۋل مەرياسىندا وتكەن سەميناردىڭ نەگىزگى تاقىرىپتارىنىڭ ءبىرى – الماتىداعى كەپتەلىس ماسەلەسىن شەشۋ بولدى، دەپ حابارلايدى Almaty-akshamy.kz 24.kz-كە سىلتەمە جاساپ.
اكىمدىك قىزمەتكەرلەرىنىڭ ايتۋىنشا، قازاقستانداعى ەڭ ءىرى قالادا جارتى ميلليونعا جۋىق كولىك بار، ءبىراق باسقا ايماقتاردان كەلەتىن ماشينالاردى قوسا ەسەپتەسە، اۆتوموبيلدەر سانى 700 مىڭعا جەتەدى. سەۋل مەرياسىنىڭ وكىلدەرى الماتى جولدارىنداعى كەپتەلىس ماسەلەسىن شەشۋگە بولاتىنىن ايتتى.
«قالالىق جەرلەردەگى كەپتەلىستەردى ازايتۋ ءۇشىن ءبىز اقىلدى باعدارشام جۇيەسىن قۇرۋدى جوسپارلاپ وتىرمىز. ءقازىر بۇل جۇيە 98 قيىلىستا جولعا ەنگىزىلگەن داچيكتەرگە نەگىزدەلىپ جۇمىس ىستەيتىن باعدارشامداردى باسقارىپ تۇر. ءبىز باسقا جۇيەلەردى دە قاراستىرىپ جاتىرمىز، ولاردىڭ ءبىرى - بەينەكامەرالاردى قولدانۋ. ياعني، اۆتوموبيلدەردى تانۋ جۇيەسى كەپتەلىستەردى ازايتۋعا كومەكتەسەدى»، - دەيدى الماتى قالاسى سيفرلاندىرۋ باسقارماسى باسشىسىنىڭ ورىنباسارى سەرىك بايعانين.
«ەگەر جولاۋشىلار جەكە كولىكتىڭ ورنىنا قوعامدىق كولىكتى تاڭداسا، كەپتەلىستى ازايتۋعا بولادى. ول ءۇشىن، ءبىز سەۋلدە ءارتۇرلى يننوۆاسيالاردى ەنگىزدىك. مىسالى، كەز-كەلگەن اۆتوبۋستا، مەترودا، تاكسيدە جول اقىسىن ءبىر كارتامەن تولەۋگە بولادى. ءار اۆتوبۋستىڭ، مەترو پويىزىنىڭ قاي جەردە ەكەنىن جانە ايالداماعا قاشان قاشان كەلەتىنىن تەلەفون ارقىلى كورۋگە بولادى. ءبىز سونداي-اق جەكە اۆتوموبيلدەردىڭ قالالىق ورتالىقتاعى كەيبىر ايماقتارعا كىرۋىن شەكتەيمىز. ەگەر مۇنداي ساياسات الماتىدا ەنگىزىلسە، مەنىڭ ويىمشا، اۆتوموبيل سانىن جانە كەپتەلىستەردى ازايتۋعا بولادى»، - دەيدى سەۋل قالاسى جوبالار اگەنتتىگىنىڭ اتقارۋشى ديرەكتورى لي دجون حەن.