2025 جىلعى 9 جەلتوقساندا يسەسكو-نىڭ باس ديرەكتورى ساليم بين مۇحاممەد ال-ماليك تۇركى مادەنيەتى جانە مۇراسى قورىنىڭ شتاب-پاتەرىنە كەلىپ، ۇيىمنىڭ پرەزيدەنتى اقتوتى رايىمقۇلوۆامەن كەزدەستى.
ساپار بارىسىندا يسەسكو دەلەگاسياسىنا قوردىڭ مادەني مۇرانى زەرتتەۋ، ساقتاۋ جانە ىلگەرىلەتۋ باعىتىندا جۇزەگە اسىرىپ جاتقان جوبالارى ۇسىنىلدى. عىلىمي ىنتىماقتاستىقتى كەڭەيتۋ جانە ينستيتۋسيونالدىق سەرىكتەستىكتى نىعايتۋ ماسەلەلەرى تالقىلاندى.
كەزدەسۋ اياسىندا تاراپتار 2026 جىلعا ارنالعان جوسپارلارىمەن الماسىپ، ءوزارا قىزىعۋشىلىق تۋدىراتىن باعىتتاردى جانە ىنتىماقتاستىقتىڭ جاڭا پەرسپەكتيۆالارىن تالقىلادى.
كەزدەسۋدىڭ ماڭىزدى بولىگى – تۇركى مادەنيەتى جانە مۇراسى قورى مەن يسەسكو اراسىنداعى ىنتىماقتاستىق تۋرالى مەموراندۋمعا قول قويۋ بولدى. بۇل قۇجات تاراپتار اراسىنداعى تاريحي سەرىكتەستىكتىڭ جاڭا كەزەڭىن اشادى.
مەموراندۋمعا قور پرەزيدەنتى اقتوتى رايىمقۇلوۆا مەن يسەسكو باس ديرەكتورى ساليم بين مۇحاممەد ال-ماليك قول قويدى.
قۇجات تۇركى-يسلام مادەني مۇراسىن حالىقارالىق دەڭگەيدە ىلگەرىلەتۋدى، مادەني مۇرا وبەكتىلەرىن زەرتتەۋ، سيفرلاندىرۋ جانە ساقتاۋدا جاڭا عىلىمي تاسىلدەردى ەنگىزۋدى، سونداي-اق ماماندار اراسىنداعى تاجىريبە الماسۋدى كۇشەيتۋدى كوزدەيدى.
بۇل ماڭىزدى قۇجات مادەني مۇرانى ساقتاۋ سالاسىنداعى جاڭا كەزەڭنىڭ باستاۋى رەتىندە باعالانىپ، تاراپتار اراسىنداعى ءتيىمدى ىنتىماقتاستىقتى ودان ءارى نىعايتۋعا ىقپال ەتەدى.
كەزدەسۋ سوڭىندا يسەسكو باس ديرەكتورى ساليم بين مۇحاممەد ال-ماليك قوردىڭ قۇرمەتتى قوناقتار كىتابىنا ىزگى لەبىزدەرىن قالدىردى.
كەزدەسۋگە يسەسكو دەلەگاسياسىنىڭ باسقا دا مۇشەلەرى قاتىستى: يسەسكو-نىڭ سەرىكتەستىك جانە حالىقارالىق ىنتىماقتاستىق سەكتورىنىڭ جەتەكشىسى انار كارىموۆ، يسەسكو-نىڭ باكۋ وڭىرلىك كەڭسەسىنىڭ ديرەكتورى ابدۋلحاكيم ال-سەنان، باكۋ وڭىرلىك كەڭسەسى ديرەكتورىنىڭ ورىنباسارى ماريام گافارزادە، ازەربايجان رەسپۋبليكاسىنىڭ يسەسكو ىستەرى جونىندەگى ۇلتتىق كوميسسياسىنىڭ حاتشىسى الەكپەر حىدىروۆ.
بۇگىنگى وتكەن جوعارى دەڭگەيدەگى كەزدەسۋ قور مەن يسەسكو اراسىنداعى حالىقارالىق مادەني مۇرانى قورعاۋ جانە دامىتۋ سالاسىنداعى ىنتىماقتاستىقتىڭ ودان ءارى تەرەڭدەۋىنە جاڭا سەرپىن بەردى.
ساپار اياسىندا مادەني باعدارلاما ۇسىنىلدى.