اۋىل شارۋاشىلىعى جانۋارلارىنىڭ جەكەلەگەن تۇرلەرىن اكەتۋگە ساندىق شەكتەۋ مەن تىيىم سالۋ ەنگىزىلدى، دەپ حابارلايدى Almaty-akshamy.kz مەملەكەتتىك كىرىستەر كوميتەتىنە سىلتەمە جاساپ
23 ماۋسىمنان باستاپ «اۋىل شارۋاشىلىعى جانۋارلارىن قازاقستان رەسپۋبليكاسىنىڭ اۋماعىنان اكەتۋدىڭ كەيبىر ماسەلەلەرى تۋرالى» اۋىل شارۋاشىلىعى ءمينيسترىنىڭ 2023 جىلعى 5 ماۋسىمداعى بۇيرىعىمەن 60 000 باس بۇقاشىق مولشەرىندە ءتىرى ءىرى قارا مالدى، 120 000 باس مولشەرىندە ءتىرى قوي جانە ەشكىنى ەل اۋماعىنان اكەتۋگە ساندىق شەكتەۋلەر ەنگىزىلەدى.
«وسى بۇيرىققا سايكەس بۇقاشىقتار مەن قوي-ەشكىلەردى ەل اۋماعىنان اكەتۋ اۋىل شارۋاشىلىعى ءمينيسترىنىڭ 2015 جىلعى 21 مامىرداعى بۇيرىعىمەن بەكىتىلگەن ۆەتەريناريالىق قۇجاتتاردى بەرۋ قاعيدالارىنا جانە ولاردىڭ بلانكىلەرىنە قويىلاتىن تالاپتارعا سايكەس بەرىلگەن ۆەتەريناريالىق سەرتيفيكات بولعان كەزدە عانا جۇزەگە اسىرىلاتىن بولادى. سونىمەن قاتار 2023 جىلعى 30 ماۋسىمنان باستاپ «اۋىل شارۋاشىلىعى جانۋارلارىن اكەتۋدىڭ كەيبىر ماسەلەلەرى تۋرالى» اۋىل شارۋاشىلىعى ءمينيسترىنىڭ 2023 جىلعى 9 ماۋسىمداعى جانە پرەمەر-مينيستردىڭ ورىنباسارى – قارجى ءمينيسترىنىڭ 2023 جىلعى 12 ماۋسىمداعى بىرلەسكەن بۇيرىعىمەن ءىرى قارا جانە ۇساق مالدى ەل اۋماعىنان اكەتۋگە تىيىم سالىنادى»، - دەلىنگەن ۆەدومستۆو حابارلاماسىندا.