اۋانىڭ لاستانۋىنان يران ەكونوميكاسى جىل سايىن 12 ملرد دوللار شىعىن كورىپ كەلەدى.
ال وتكەن جىلى (2024 ج.) پارسى ەلىندە لاس اۋانىڭ كەسىرىنەن 50 مىڭعا تارتا ادام كوز جۇمعان، دەپ حابارلايدى aqshamnews.kz.
بۇل جايىندا islam.kz پورتالى ءوز كەزەگىندە يراننىڭ دەنساۋلىق ساقتاۋ ءمينيسترى مۇحاممەدرەزا زافارعان مالىمدەمەسىندە كەلتىرىلگەن دەرەككە ءجون سىلتەگەن Anadolu اقپارات اگەنتتىگىنە سىلتەمە جاساي وتىرىپ ءمالىم ەتەدى.
مينيستر تازا اۋا كۇنىنە ارنالعان ۇلتتىق جينالىستا مىنبەردەن ءسوز الىپ، جىل سايىن ەلدەگى ءولىم-جىتىمنىڭ 12،56%-ى اۋانىڭ لاستانۋىمەن بايلانىستى ورىن الاتىنىن جاسىرمادى. حالىقارالىق ستاندارتقا سايكەس اۋانىڭ ءبىر تەكشە مەترىندە زياندى بولشەكتەردىڭ مولشەرى 5 ميكروگرامنان اساتىن بولسا، ياعني، شوعىرلانسا، بۇل دەڭگەي اۋانىڭ لاستانعانىن بىلدىرەتىن كورسەتكىش. ال يران اۋماعىنداعى بۇل كورسەتكىش 12 ميكروگرامعا جەتكەن.
يران حالقى جىلدىڭ 247 كۇنىن لاستانعان اۋامەن تىنىستاپ وتكىزەدى ەكەن. ال ەل استاناسى – تەھران قالاسىنىڭ تۇرعىندارى جىلىنا 353 كۇن لاستانعان اۋامەن تىنىستاۋعا تۋرا كەلەدى. بۇعان ەڭ الدىمەن اۋا اينالىمى ءۇشىن تەھراننىڭ جاعرافيالىق تۇرعىدان قولايسىز ايماقتا ورنالاسقاندىعى سەبەپ بولىپ وتىر. بۇدان بولەك، سانكسياعا بايلانىستى توزىعى جەتكەن اۆتوكولىكتەر دە اۋانىڭ لاستانۋىنا كوپ ۇلەس قوسىپ وتىر.