الماتىدا وتباسىلىق جانجالعا قاتىسى بار ەر ادامنىڭ اڭشى قارۋى تاركىلەندى.
الماتى قالاسىنىڭ پوليسيا قىزمەتكەرلەرى وتباسىلىق-تۇرمىستىق قاتىناستار اياسىندا بولاتىن قۇقىق بۇزۋشىلىقتار مەن قىلمىستاردىڭ الدىن الۋ ماقساتىندا 20-29 قاڭتار ارالىعىندا "تۇرمىس" جەدەل-پروفيلاكتيكالىق ءىس-شاراسىن وتكىزۋدە، دەپ حابارلايدى aqshamnews.kz Polisia.kz-كە سىلتەمە جاساپ..
الماتى قالاسى پوليسيا دەپارتامەنتىنىڭ مالىمەتىنشە، وتباسىلىق-تۇرمىستىق جانجالدار كوبىنە ىشىمدىك ءىشۋ نەمەسە ەرلى-زايىپتىلار اراسىنداعى قىزعانىش سالدارىنان تۋىندايدى. مۇنداي وقيعالاردىڭ الدىن الۋ ءۇشىن قۇقىق قورعاۋ ورگاندارى تۇسىندىرمە جۇمىستارىن جۇرگىزىپ، انىقتالعان ءاربىر قۇقىق بۇزۋشىلىق بويىنشا ءتيىستى شارا قولدانادى. وسىنداي وقيعالاردىڭ ءبىرى بوستاندىق اۋدانىندا تىركەلدى.
پوليسياعا تۇسكەن اقپارات بويىنشا، بۇل وتباسىندا ءجيى جانجال بولىپ تۇراتىندىقتان، ولار ءتارتىپ ساقشىلارىنىڭ نازارىندا بولعان. زەردەلەۋ بارىسىندا وتاعاسىنىڭ تىركەلگەن اڭشىلىق قارۋى بار ەكەنى انىقتالدى. سونىمەن قاتار ونىڭ تۇراقتى تۇردە ىشىمدىك ءىشىپ، وتباسىلىق تىنىشتىقتى بۇزاتىنى بەلگىلى بولدى. وقيعانىڭ قايعىلى جاعدايعا ۇلاسۋىنىڭ الدىن الۋ ماقساتىندا پوليسيا قىزمەتكەرلەرى ەر ادامنىڭ اڭشىلىق قارۋىن تاركىلەۋ تۋرالى شەشىم قابىلدادى.