60 ادام جاراقات العان.
ساياسي تۇتقىندار جاتقان تەگەراننىڭ «ەۆين» تۇرمەسىندە ءورت شىعىپ، سەگىز ادام قازا تاپتى. 60 ادام جاراقات العان، دەپ حابارلايدى Almaty-akshamy.kz قازاقپاراتقا سىلتەمە جاساپ.
رەسمي دەرەك بويىنشا، سەنبى كۇنى كەشكىسىن تۇرمەنىڭ تىگىن سەحىندا تارتىپسىزدىك سالدارىنان ءورت تۇتانعان.
بارلىق قازا تاپقاندار ۇرلىق جاساعانى ءۇشىن جازاسىن وتەپ جاتقان.
الەۋمەتتىك جەلىدە تاراعان ۆيدەودا «ديكتاتور ءولۋى كەرەك!» دەپ ايقايلاعان داۋىستار، وق اتىلعانى جانە جارىلىس كورىنىس تاپقان.
Associated Press اقپارات اگەنتتىگى جەكسەنبىدە Planet Labs PBC كومپانياسى تۇسىرگەن سپۋتنيك سۋرەتتەرىن تاراتتى.
ونداعى فوتوسۋرەتتەردەن «ەۆين» تۇرمەسىنىڭ سولتۇستىك بولىگىنىڭ كەشەنىنە كىرەتىن ۇلكەن عيماراتتىڭ توبەسى ورتەنىپ كەتكەنى بايقالادى.
يران بيلىگى بۇل وقيعانىڭ انتيۇكىمەتتىك نارازىلىقتارعا قاتىسى جوق دەپ وتىر.
ەۋرووداق يراننىڭ 11 جەكە جانە 4 زاڭدى تۇلعاسىنا قارسى سانكسيا سالدى.