قازاقستان قارجىگەرلەرى قاۋىمداستىعىنىڭ مالىمەتىنە سۇيەنسەك، 2023 جىلعى قىركۇيەك ايىنىڭ اياعىندا بانكتەردىڭ نەسيە پورتفەلىنىڭ جالپى مولشەرى 27،7 ترلن تەڭگەگە جەتكەن.
توعىز ايدىڭ ىشىندە ءوسىم كورسەتكىشى - 14،2 پايىز. كرەديتتىك سەكتوردا بولشەك نەسيە پورتفەلى (جەكە تۇلعالارعا بەرىلگەن نەسيەلەر) باياۋ وسە باستاعانى بايقالعان، دەپ حابارلايدى اlmaty-akshamy.kz.
بىلتىر بۇل كورسەتكىش 21،5 پايىزعا تەڭ بولسا، بيىل 18،5 پايىز عانا بولعان. وعان قوسا قارىز الۋشىلاردىڭ سانى ازايعان – بىلتىر 373،3 مىڭ ادام نەسيە راسىمدەسە، بيىل تەك 327،6 مىڭ ادام نەسيە العان. اسىرەسە يپوتەكا الۋ كورسەتكىشى كۇرت ازايعانى بايقالادى. بىلتىر ءوسىم 28،8 پايىز بولسا، بيىل، ياعني 2023 جىلى 9،9 پايىزعا دەيىن تومەندەگەن.
ساراپشىلاردىڭ ايتۋىنشا، ءوز كەزەگىندە بۇل تۇتىنۋشىلىق نەسيەلەندىرۋ كورسەتكىشىنە كەرى اسەر ەتەدى – 2022 جىلعى قارجىلىق تۇراقتىلىق ەسەبى بويىنشا، قازاقستاندا يپوتەكا الۋشىلاردىڭ جارتىسىنان كوبى الداعى 3 ايدا تۇتىنۋشىلىق نەسيە الادى. ايتا كەتەيىك، يپوتەكالىق نەسيە نارىعىنداعى سۇرانىستىڭ تومەندەۋى اۋەلى جەڭىلدىكتەر قاراستىرىلعان باعدارلامالاردى، ونىڭ ىشىندە "7-20-25" باعدارلاماسىن قارجىلاندىرۋدىڭ شەكتەلۋىمەن بايلانىستى. 2023 جىلى بۇل باعدارلاماعا بولىنگەن قارجى مولشەرى نەبارى 100 ملرد تەڭگە بولعان ەدى، ياعني ءار توقسانعا 25 ملرد تەڭگە بولىنگەن. وسىلايشا نارىقتىق يپوتەكاعا سۇرانىس بىرتە-بىرتە ارتىپ كەلەدى – بىلتىر 10 يپوتەكانىڭ توعىزىندا جەڭىلدىكتەر قاراستىرىلسا، بۇگىندە بارلىق نەسيەنىڭ شامامەن 25 پايىزى نارىقتىق شارت بويىنشا بەرىلىپ جاتىر.