ورتالىق كوممۋنيكاسيالار قىزمەتىنىڭ الاڭىندا Instagram جانە Facebook جەلىلەرىندە قازاقستاندىق مۋزىكالىق كونتەنتتىڭ نەگە قولجەتىمسىز بولعانى تالقىلاندى.
بۇل تاقىرىپقا قاتىستى رەسمي مالىمدەمەنى ق ر ادىلەت مينيسترلىگى زياتكەرلىك مەنشىك قۇقىعى كوميتەتىنىڭ ءتورايىمى شولپان ابدىرەيەۆا جاسادى، دەپ حابارلايدى aqshamnews.kz El.kz اقپارات اگەنتتىگىنە سىلتەمە جاساپ.
ونىڭ ايتۋىنشا، الەۋمەتتىك جەلىلەردە مۋزىكالىق شىعارمالاردى زاڭدى تۇردە پايدالانۋ ءۇشىن اۆتوردىڭ نەمەسە قۇقىق يەسىنىڭ كەلىسىمى قاجەت.
اۆتورلىق قۇقىق سالاسىنداعى ۇلتتىق زاڭناما مەن حالىقارالىق كونۆەنسيالار مۋزىكالىق تۋىندىلاردى، اسىرەسە ينتەرنەت پەن الەۋمەتتىك جەلىدە پايدالانۋ ءۇشىن اۆتوردىڭ نەمەسە قۇقىق يەسىنىڭ رۇقساتى بولۋى كەرەكتىگىن ناقتى بەلگىلەيدى. ارينە، زاڭنامادا كەيبىر جاعدايلاردا اۆتوردىڭ كەلىسىمىنسىز، سىياقى تولەمەي پايدالانۋعا رۇقسات بەرەتىن ەركىن پايدالانۋ ءتارتىبى بار. ءبىراق بۇل جاعدايلار ناقتى ءارى شەكتەۋلى تۇردە رەتتەلگەن، – دەدى ابدىرەيەۆا.
ايتا كەتەيىك، 2023 جىلدىڭ سوڭىندا Meta كومپانياسى مەن قازاقستاندىق قۇقىقتى باسقارۋ ۇيىمدارى اراسىنداعى كەلىسىم مەرزىمى اياقتالىپ، جاڭارتىلماعان بولاتىن. سونىڭ سالدارىنان Instagram جانە Facebook پلاتفورمالارىنان قازاق اندەرى ۋاقىتشا الىنىپ تاستالدى.
قازىرگى ۋاقىتتا ماسەلە شەشىمىن تاپتى – جاڭا كەلىسىمگە قول قويىلىپ، قازاقستاندىق مۋزىكا پلاتفورمالاردا قايتا قولجەتىمدى بولماق. كەلىسىمشارت ەكى جىل مەرزىمگە جاسالعان.