الماتىدا ءوتىپ جاتقان ينكليۋزيۆتى ءبىلىم بەرۋ سالاسىنداعى العاشقى دۇنيەجۇزىلىك كونگرەسس (World Inclusion Congress – WIC 2025) اياسىندا «ينكليۋزيۆتى ءبىلىم بەرۋ جونىندەگى» الماتى دەكلاراسياسى تالقىلاندى، دەپ حابارلايدى aqshamnews.kz
بۇل تۋرالى ق ر وقۋ-اعارتۋ مينيسترلىگىنىڭ باسپا ءسوز قىزمەتى حابارلادى.
«بۇل دەكلاراسيا – ادامي كاپيتالدى دامىتۋ، الەۋمەتتىك بىرلىكتى نىعايتۋ جانە زاماناۋي تەحنولوگيالار ارقىلى جاڭا مۇمكىندىكتەر اشۋ ءۇشىن ناقتى باعدار. قازاقستان تاراپىنان ۇسىنىلعان دەكلاراسيا ءار بالانىڭ الەۋەتىن تولىق اشۋعا باعىتتالعان. ءبىز «ءبىلىم – بارشاعا» قاعيداتى اياسىندا ينكليۋزيۆتى ءبىلىم بەرۋدى قاجەت ەتەتىن تۇلعالاردىڭ ساپالى جانە تەڭ قولجەتىمدى ءبىلىم الۋىن قامتاماسىز ەتەتىنىنە سەنەمىز. ينكليۋزيۆتى ءبىلىم بەرۋ – ءبىزدىڭ قۇندىلىقتارىمىزدىڭ جانە بولاشاققا قۇرىلعان سەنىمىمىزدىڭ ايناسى. ول ادىلەتتى، قامقور جانە بارشاعا اشىق مەملەكەتتىڭ نەگىزى بولىپ تابىلادى»، – دەدى قازاقستان رەسپۋبليكاسىنىڭ وقۋ-اعارتۋ ءمينيسترى جۇلدىز سۇلەيمەنوۆا.
الماتى دەكلاراسياسىندا ۇلتتىق ۇكىمەتتەرگە، ءبىلىم بەرۋ ۇيىمدارىنا جانە حالىقارالىق قاۋىمداستىققا ارنالعان ۇسىنىستار قامتىلعان. ولاردىڭ قاتارىندا:
•ءبىلىم الماسۋ جانە تاجىريبە تاراتۋ پلاتفورمالارىن قۇرۋ؛
•بىرلەسكەن جوبالاردى دامىتۋ جانە قولداۋ؛
•دامۋشى ەلدەرگە كومەك كورسەتۋدى كەڭەيتۋ؛
•ءارتۇرلى سالالار اراسىنداعى سەرىكتەستىكتى نىعايتۋ؛
•كورپوراتيۆتىك جانە حالىقارالىق ۇيىمداردى تارتۋ؛
•ينكليۋزيۆتى ءبىلىم بەرۋ بويىنشا مونيتورينگ پەن ەسەپ بەرۋ مەحانيزمدەرىن ەنگىزۋ بار.
الماتى دەكلاراسياسى قاتىسۋشىلاردىڭ قولداۋىمەن ءبىر اۋىزدان ماقۇلداندى. ول كونگرەسس ۇستانىمىن بەينەلەيتىن قۇجات رەتىندە يۋنەسكو-عا جولدانادى جانە ينكليۋزيۆتى ءبىلىم بەرۋدى دامىتۋ بويىنشا ەلدەردىڭ ساياساتتارىن قالىپتاستىرۋدا پايدالانۋ ءۇشىن قاتىسۋشى مەملەكەتتەر اراسىندا تاراتىلادى.
بۇل قازاقستاننىڭ ينكليۋزيۆتى ءبىلىم بەرۋدى جاھاندىق دەڭگەيدە ىلگەرىلەتۋگە قوسقان ماڭىزدى ۇلەسى. ول حالىقارالىق ىنتىماقتاستىقتى نىعايتۋعا، جاڭا سەرىكتەستىكتەر ورناتۋعا جانە ءاربىر بالانىڭ الەۋەتىن اشۋعا باعىتتالعان بىرەگەي باستاما بولىپ تابىلادى.