الماتى قالاسىندا كونتەينەرلىك ساۋدانىڭ ءداۋىرى اياقتالىپ، وسى زامانعى، جايلى ءارى اشىق ساۋدا فورماتىنداعى بازارلارعا كوشۋ كەزەڭى باستالدى. بۇل تۋرالى الماتى قالاسى اكىمىنىڭ ورىنباسارى ولجاس سماعۇلوۆ الماتى وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا حابارلادى.
«ءبىزدىڭ ماقساتىمىز – بازارلاردى قايتا سالۋ عانا ەمەس، ءقاۋىپسىز جانە قولايلى ساۋدا كەڭىستىگىن قالىپتاستىرۋ. مۇندا بيزنەس دامىپ، قالا تۇرعىندارى ءوزىن جايلى سەزىنۋى ءتيىس. بۇل ساتىپ الۋشىلاردى، كاسىپكەرلەردى جانە قالانىڭ ءوزىن قورعاۋعا باعىتتالعان «ساۋدا قىزمەتىن رەتتەۋ تۋرالى» ق ر زاڭىنىڭ تالابى»، – دەپ اتاپ ءوتتى ولجاس سماعۇلوۆ.
بۇگىندە الماتىدا 29 بازار تولىقتاي جاڭعىرتىلىپ، ولاردىڭ اۋماعىندا كۇردەلى قۇرىلىستار سالىندى، ينجەنەرلىك ينفراقۇرىلىم جاڭارتىلدى. تاعى 21 بازار جاڭعىرتىلىپ جاتىر، ول جۇمىس 2026 جىلدىڭ سوڭىنا دەيىن اياقتالادى. ەسكىرگەن «جىبەك جولى» بازارىنىڭ ورنىنا جاڭا مەنشىك يەسى وسى زامانعى تۇرعىن ءۇي كەشەنى مەن ساۋدا ورتالىعىن سالعالى وتىر.
جالپى، سوڭعى جىلدارى قالاداعى بازارلاردىڭ سانى 59-دان 51-گە دەيىن ازايدى، بۇل ءتورت نىساننىڭ ساۋدا ورتالىقتارىنا قايتا بەيىندەلۋىمەن بايلانىستى.
اكىمدىك كاسىپكەرلەردىڭ الاڭداۋشىلىعىن تۇسىنەدى. جالعا الۋا باعاسىنىڭ ءوسۋى تابىستى ارتتىرۋ ماقساتىندا ەمەس، قايتا جاڭعىرتۋدان كەيىنگى پايدالانۋ مەن كوممۋنالدىق شىعىنداردىڭ كوبەيۋىنە بايلانىستى بولىپ وتىر. سەبەبى جاڭارتىلعان بازارلار ورتالىقتاندىرىلعان جىلۋ، سۋ جانە كارىز جۇيەلەرىنە قوسىلادى، سانيتارلىق تالاپتار مەن اباتتاندىرىلعان اۋماق قامتاماسىز ەتىلەدى. رەكونسترۋكسيا كەزەڭىندە جالعا الۋشىلارعا ساۋدا ورىندارى ۋاقىتشا جەڭىلدىكپەن بەرىلەدى.
ايتا كەتەيىك، ق ر اكىمشىلىك قۇقىق بۇزۋشىلىق تۋرالى كودەكسىنىڭ 204-2-بابىنا سايكەس، بازارلاردى مودەرنيزاسيالاماۋ اكىمشىلىك جاۋاپكەرشىلىككە اكەپ سوعادى. 2026 جىلعى 1 قاڭتاردان باستاپ تالاپتاردى ورىنداماعان بازارلاردىڭ قىزمەتى ۋاقىتشا توقتاتىلادى.