قازىرگى جاعداي بازالىق مولشەرلەمەنى بارىنشا ۇزاق ۋاقىت بويى ۇستاپ تۇرۋعا ماجبۇرلەپ وتىر
ناۋرىز ايىنان باستاپ جىلدىق ينفلياسيا تومەندەۋى مۇمكىن. بۇل تۋرالى ۇلتتىق بانك ءتوراعاسى عالىمجان ءپىرماتوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ۇلتتىق بانك تاۋەلسىز اقشا-كرەديت ساياساتىن جۇرگىزەدى. بازالىق مولشەرلەمەنى تومەندەتۋدى باستاۋ ءۇشىن ينفلياسيا مەن ينفلياسيالىق كۇتۋلەر تومەندەۋىنىڭ تۇراقتى تەندەنسياسىنا قول جەتكىزۋىمىز قاجەت. جاڭا شوكتار بولماعان جاعدايدا، جەتىستىكتەرگە جەتكەندە، بازالىق مولشەرلەمەنى تومەندەتۋگە كىرەسە الامىز»، - دەدى ول ەلوردادا وتكەن بريفينگ بارىسىندا ب ا ق وكىلدەرىنىڭ ساۋالىنا وراي.
ونىڭ ناقتىلاي تۇسۋىنشە، ۇلتتىق بانك بازالىق مولشەرلەمەنى كوتەرۋ سيكلىن اياقتاۋعا جاقىن. سونىمەن قاتار ول ينفلياسيانىڭ قاشان شىرقاۋ شەگىنە جەتىپ، ودان كەيىن تومەندەيتىندىگىنە قاتىستى ساۋالعا دا جاۋاپ بەردى.
«جاڭا شوكتار بولماعان جاعدايدا، ينفلياسيانىڭ شىرقاۋ شەگىن ءبىرىنشى توقساندا، ناقتىراق ايتقاندا، اقپاندا بولادى دەپ كۇتەمىز. ءبىزدىڭ ويىمىزشا، جىلدىق ەڭ جوعارى ينفلياسيا تىركەلەتىن بولادى. ناۋرىزدان باستاپ جىلدىق ينفلياسيانىڭ تومەندەۋىن كۇتەمىز. قازىرگى جاعداي بازالىق مولشەرلەمەنى بارىنشا ۇزاق ۋاقىت بويى ۇستاپ تۇرۋعا ماجبۇرلەپ وتىر»، - دەدى عالىمجان ءپىرماتوۆ.