بجت قالا تۇرعىندارى ءۇشىن 1 ايلىق ەسەپتىك كورسەتكىش، اۋىلدا 0،5 اەك كولەمىندە بەلگىلەنگەن
2023 جىلدىڭ 1 قاڭتارىنان باستاپ مىندەتتى الەۋمەتتىك مەديسينالىق ساقتاندىرۋعا تولەنەتىن جارنالار مەن اۋدارىمدار مولشەرى وزگەردى. بيىل كىم قانشا جارنا تولەيدى؟ جارنا كولەمىنىڭ وزگەرۋىنە نە تۇرتكى بولدى؟ وسى ماسەلەگە قاتىستى سۇراقتارعا مەديسينالىق ساقتاندىرۋ قورىنىڭ الماتى فيليالى ديرەكتورى تىلەۋحان ابىلدايەۆ جاۋاپ بەردى، دەپ حابارلايدى Almaty-akshamy.kz.
«2022-2024 جىلدارعا ارنالعان رەسپۋبليكالىق بيۋدجەت تۋرالى» زاڭدا ەڭ تومەنگى جالاقى (ەتج) مەن ايلىق ەسەپتىك كورسەتكىش (اەك) مولشەرى بەلگىلەنگەن بولاتىن. ول بويىنشا بيىل:
• ەڭ تومەنگى جالاقى – 70 000 تەڭگە؛
• ايلىق ەسەپتىك كورسەتكىش – 3 450 تەڭگەنى قۇراپ وتىر.
فيليال باسشىسى جارنا تولەۋشىلەردىڭ بىرنەشە ساناتىن اتاپ ءوتتى. ءبىرىنشىسى – مەملەكەت تاراپىنان ساقتاندىرىلاتىن 15 جەڭىلدىك ساناتى. وعان بالالار، زەينەتكەرلەر، ۇوس ارداگەرلەرى، بارلىق توپتاعى مۇگەدەكتەر، «التىن القا»، «كۇمىس القامەن» ماراپاتتالعان كوپ بالالى انالار، جۇمىس ىستەمەيتىن جۇكتى ايەلدەر، دەكرەتتە وتىرعان انالار، مۇگەدەك بالا كۇتىمىنە بايلانىستى جۇمىس ىستەمەيتىن ازاماتتار، ستۋدەنتتەر ت.ب. كىرەدى. جەڭىلدىك بەرىلگەن حالىقتىڭ جالپى سانى 11 ميلليونعا جەتىپ جىعىلادى.
اتاپ ايتقاندا، بيىل جۇمىس بەرۋشىلەر قاراماعىنداعى قىزمەتكەرلەر ءۇشىن بۇرىنعىشا، جالاقىنىڭ 3% مولشەرىندە اۋدارىم جاسايدى.تولەمنىڭ شەكتى مولشەرى 10 ەتج نەمەسە 21 مىڭ تەڭگەدەن اسپايدى. جۇمىس بەرۋشى اۋدارىمدى ءوز قالتاسىنان تولەيدى. ال، جۇمىسكەرلەر جالاقىسىنان 2% ۇستاپ قورعا اۋدارادى. جارنانىڭ شەكتى مولشەرى 10 ەتج نەمەسە 12 مىڭ تەڭگەدەن اسپاۋى ءتيىس.
ودان كەيىنگى سانات – جەكە كاسىپكەرلەر. نوتاريۋستار، جەكە سوت ورىنداۋشىلارى، ادۆوكاتتار دا وسى ساناتقا كىرەدى. ولار بۇرىنعىشا 1،4 ەتج-نىڭ 5 پروسەنتىن تولەيدى. بيىل ەڭ تومەنگى جالاقىنىڭ وسۋىنە بايلانىستى بۇل سوما 4 900 تەڭگەگە جەتتى.
ازاماتتىق-قۇقىقتىق كەلىسىمشارت بويىنشا ەڭبەك ەتەتىندەر ساقتاندىرۋعا بۇرىنعىشا تابىسىنىڭ 2% اۋدارادى.
«قازاقستاندا ءوزىن-وزى جۇمىسپەن قامتىعان ازاماتتار بار. ولاردىڭ جالپى سانى 1 ميلليونعا جۋىقتايدى. بۇل ازاماتتار ساقتاندىرۋ جۇيەسىنە قوسىلۋ ءۇشىن ەكى ءتۇرلى ءادىستى پايدالانسا بولادى. ءبىرىنشىسى – دەربەس تولەۋشى رەتىندە ءبىر ەتج-نىڭ 5% نەمەسە 3 500 تەڭگە تولەۋ. ەكىنشىسى – ءبىرىڭعاي جيىنتىق تولەم تولەۋ. بجت قالا تۇرعىندارى ءۇشىن 1 ايلىق ەسەپتىك كورسەتكىش، اۋىلدا – 0،5 اەك كولەمىندە بەلگىلەنگەن. بيىل 1 اەك 3450 تەڭگەنى قۇرايدى»، - دەدى تىلەۋحان ابىلدايەۆ.
بجت ءتورت ءتۇرلى مىندەتتى تولەمنەن تۇرادى:
• جەكە تابىس سالىعى؛
• مەملەكەتتىك الەۋمەتتىك ساقتاندىرۋ قورىنا تولەنەتىن الەۋمەتتىك تولەمدەر؛
• زەينەتاقى جارناسى؛
• ءمامس جارناسى.
ساقتاندىرۋ جۇيەسىنە قاتىستى تولىعىراق مالىمەتتى 1406 ءبىرىڭعاي بايلانىس ورتالىعىنان الۋعا بولادى.