ۇكىمەتتىڭ الدىنداعى كۇردەلى مىندەتتىڭ ءبىرى – ينفلياسيانى ۇستاپ تۇرۋ.
بۇل تۋرالى بۇگىن ۇكىمەت وتىرىسىندا ق ر پرەمەر-مينيسترى ءاليحان سمايىلوۆ ايتتى، دەپ حابارلايدى Almaty-akshamy.kz
«جالپى العاندا، ەلىمىزدىڭ الەۋمەتتىك-ەكونوميكالىق دامۋىنا شەكتەۋ شارالارىنىڭ اسەرىن بارىنشا ازايتا الدىق. بۇل جۇمىستى جالعاستىرۋىمىز كەرەك. بىزبەن كورشىلەس ەلدەردىڭ ەكونوميكاسىنا سانكسيالاردىڭ ىقپالى كۇشەيە ءتۇستى. سونىمەن قاتار، ۇكىمەتتىڭ الدىنداعى كۇردەلى مىندەتتىڭ ءبىرى – ينفلياسيانى ۇستاپ تۇرۋ. ناۋرىز ايىنىڭ قورىتىندىسى بويىنشا ەلىمىزدەگى جىلدىق ينفلياسيانىڭ دەڭگەيى 12 پايىزدى قۇرادى»، -دەدى ۇكىمەت باسشىسى.
ءاليحان سمايىلوۆتىڭ پايىمىنشا، وعان ءبىرىنشى كەزەكتە، ءبىزدىڭ ساۋدا جاساپ وتىرعان سەرىكتەس ەلدەردەگى ينفلياسيانىڭ ءوسۋى مەن الەمدىك ازىق-تۇلىكتىڭ قىمباتتاۋى تىكەلەي اسەر ەتكەن.
«بىرىككەن ۇلتتار ۇيىمى ازىق-تۇلىك جانە اۋىل شارۋاشىلىعى ۇيىمىنىڭ مالىمەتى بويىنشا بيىلعى ناۋرىز ايىنداعى ازىق-تۇلىك باعاسىنىڭ الەمدىك يندەكسى 159 پايىزدىق تارماققا دەيىن ءوسىپ، سوڭعى 30 جىلدا بولماعان ەڭ جوعارى دەڭگەيگە جەتكەن. الەمدە نەگىزىنەن ءداندى داقىلدارعا، وسىمدىك مايىنا، قانتقا، ەت پەن ءسۇت ونىمدەرىنە باعا ءوسىپ كەتكەن. بۇل ءبىزدىڭ نارىققا دا تىكەلەي اسەر ەتىپ وتىر»، - دەدى ول.
وسى ورايدا ۇكىمەت باسشىسى ەل پرەزيدەنتىنىڭ تاپسىرماسى بويىنشا 2022-2024 جىلدارعا ارنالعان ينفلياسيا دەڭگەيىن باقىلاۋ جانە تومەندەتۋ بويىنشا كەشەندى شارالار ىسكە اسىرىلىپ جاتقانىن ايتتى.
«ينفلياسيانى ۇستاپ تۇرۋ ءۇشىن قاجەتتى قۇرالدار بار. مەملەكەتتىك ورگاندار مەن اكىمدىكتەر ولاردى ءتيىمدى پايدالانىپ، بۇل ماسەلەنى ەرەكشە نازاردا ۇستاۋى ءتيىس»، - دەدى پرەمەر-مينيستر.