ال ازىق-تۇلىككە جاتپايتىن تاۋارلار باعاسى ناۋرىزدا 8،6%-دان 10،9%-عا دەيىن ءوستى.
ۇكىمەت پەن جەرگىلىكتى اتقارۋشى ورگاندار باعانىڭ ماۋسىمدىق وسۋىنە جول بەرمەي، الدىن الۋ شارالارىن قابىلداۋى قاجەت، دەپ حابارلايدى Almaty-akshamy.kz
بۇل تۋرالى ق ر ۇلتىق بانكىنىڭ ءتوراعاسى عالىمجان ءپىرماتوۆ ايتتى.
«ازىق-تۇلىك تاۋارلارى ينفلياسياعا ەڭ كوپ ۇلەس قوستى، ولاردىڭ ءوسۋى 10 %-دان 15،4 %-عا دەيىن جەدەلدەدى. ورامجاپىراق، قانت، كارتوپ، قىزاناق باعالارىنىڭ ايتارلىقتاي ءوسۋى بايقالدى. ناۋرىزدىڭ ءتورتىنشى اپتاسىنىڭ قورىتىندىسى بويىنشا، الەۋمەتتىك ماڭىزى بار ازىق-تۇلىك تاۋارلارىنىڭ باعاسى جىلدىق كورسەتۋدە 18،6%-عا دەيىن وسكەن. بۇل وسۋگە ناۋرىزدىڭ ەكىنشى اپتاسىندا جەكەلەگەن ازىق-تۇلىك تاۋارلارىنا سۇرانىستىڭ ارتۋى ايتارلىقتاي ۇلەس قوستى. الەۋمەتتىك ماڭىزى بار ازىق-تۇلىك تاۋارلارى باعاسىنىڭ اپتالىق ءوسۋى ناۋرىزدىڭ سوڭعى اپتاسىندا 1،3 %، ءساۋىردىڭ ءبىرىنشى اپتاسىندا 0،9 % بولىپ، تۇراقتانىپ كەلەدى»، - دەدى ۇلتتىق بانك ءتوراعاسى ۇكىمەتتىڭ بۇگىنگى وتىرىسىندا.
ونىڭ ايتۋىنشا، ازىق-تۇلىككە جاتپايتىن تاۋارلار باعاسى ناۋرىزدا 8،6%-دان 10،9 %-عا دەيىن قىمباتتادى. وعان تەڭگە باعامىنىڭ السىرەۋى جانە ازىق-تۇلىككە قاراعاندا تومەنىرەك بولسا دا، ارتىق سۇرانىستىڭ قىسىمى سەبەپ بولدى. اقىلى قىزمەت كورسەتۋ باعاسى 7،1%-دان 8،3%-عا دەيىن جەدەلدەدى، بۇل ءبىرقاتار نارىقتىق قىزمەتتەر باعاسىنىڭ وسۋىنە بايلانىستى بولدى.
«پروينفلياسيالىق تاۋەكەلدەردىڭ كۇشەيۋىن ەسكەرە وتىرىپ، ينفلياسيا بولجامى ءوسۋ جاعىنا قاراي قايتا قارالۋدا. ۇكىمەت پەن جەرگىلىكتى اتقارۋشى ورگاندار باعانىڭ ماۋسىمدىق وسۋىنە جول بەرمەي، الدىن الۋ شارالارىن قابىلداۋى قاجەت. وڭىرلەردىڭ قاجەتتىلىكتەرىن ەسكەرە وتىرىپ، ءوڭىرارالىق اعىنداردى ۋاقىتىلى ۇيىمداستىرىپ، ەلدى الەۋمەتتىك ماڭىزى بار ازىق-تۇلىك تاۋارلارىمەن قامتاماسىز ەتۋ ماسەلەسىن تۇراقتى باقىلاۋ ماڭىزدى. باعانىڭ نەگىزسىز وسۋىنە جول بەرمەۋ ءۇشىن باعا ۇستەمەسىنە ءتيىمدى باقىلاۋ جۇرگىزۋ قاجەت»، - دەدى عالىمجان ءپىرماتوۆ.