Subaru Kazakhstan ج ش س كونتەينەرلەرى جۇڭگو اۋماعىندا 5 اي تۇرىپ قالعان.
كاسىپكەرلەردەن قىتايدا تۇرىپ قالعان كونتەينەرلەرگە قاتىستى شاعىمدار 2020 جىلدان باستاپ ءتۇسىپ جاتىر، دەپ حابارلايدى Almaty-akshamy.kz «اتامەكەن» ۇلتتىق كاسىپكەرلەر پالاتاسىنا سىلتەمە جاساپ.
بىلتىردان بەرى قىتايدا تۇرىپ قالعان قازاقستاندىق 1300-گە جۋىق كونتەينەر قازاقستانعا كەلىپ، ءارى قاراي بيزنەسمەندەردىڭ كەلىسىمشارتتىق مىندەتتەمەلەرىنە سايكەس باسقا ەلدەرگە بەت الدى.
«اتامەكەن» ۇلتتىق كاسىپكەرلەر پالاتاسىنىڭ دەرەگىنشە، بۇگىندە جۇڭگو 45 كونتەينەردى ليانيۋنگان پورتىنان شىعارۋ جونىندەگى جوسپارعا قوستى، تاعى 96 كونتەينەر قازاقستان شەكاراسىنا جول تارتتى. Subaru Kazakhstan ج ش س كونتەينەرلەرى جۇڭگو اۋماعىندا 5 اي تۇرىپ قالعان. جاقىن كۇندەرى كونتەينەرلەر قازاقستانعا جەتتى. جۇكتەردىڭ كەشىگۋى كومپانيا ءۇشىن قوسىمشا شىعىن بولدى.
«كومپانيامىز ساپالى بولشەكتەردى جاپونيادان ساتىپ الادى. قىتايمەن شەكارادا بولشەكتەردىڭ تۇرىپ قالۋىنا بايلانىستى قارجىلاي شىعىندار ءوستى. بۇل جايت تەحنيكانىڭ باستاپقى قۇنىنا تەرىس اسەر ەتەدى. سونىمەن قاتار ءبىز Subaru-دىڭ رەسمي ديستريبيۋتورىمىز جانە زاۋىتتان كەپىلدىك بەرەمىز. دەمەك، قوسالقى بولشەكتەردى جەتكىزۋدەگى كەز كەلگەن كىدىرىس كليەنتتەرىمىزدى كۇتۋگە، ال ءبىزدى ولاردىڭ الدىنداعى مىندەتتەمەلەرىمىزدى بۇزۋعا ءماجبۇر ەتەدى»، – دەدى Subaru Kazakhstan ج ش س ديرەكتورى اقىلبەك اناربايەۆ.
«اتامەكەن» ۇكپ مالىمەتىنشە، قىتايدان جۇك تيەلگەن كونتەينەرلەر ەلگە كەلە جاتىر. ۇلتتىق پالاتا وسى تۇرىپ قالعان جۇكتەر تۋرالى دەرەكتەردى 2021-2022 جىلدار ارالىعىندا سالالىق ۆەدومستۆولار مەن «قازاقستان تەمىر جولى» كومپانياسىنا حابارلاعان.
«ءقازىر ءبىز وڭ ديناميكانى بايقاپ وتىرمىز. ۇلتتىق پالاتا 1342 كونتەينەر تۋرالى دەرەكتەرمەن تاعى ءبىر ءتىزىمدى جىبەردى. سول تىزىمدەگى تۇرىپ قالۋ مەرزىمى تىم ۇزارىپ كەتكەن. شەكارادا 1-دەن 4-كە دەيىن كونتەينەرى بار شاعىن جانە ورتا بيزنەس سۋبەكتىلەرىنىڭ جۇكتەرى 6-7 ايدان اسا ۋاقىت تۇرىپ قالدى. بۇل ءتىزىم بويىنشا ىلگەرىلەۋدى كورىپ وتىرمىز»، – دەپ اتاپ ءوتتى «اتامەكەن» ۇكپ ءتورالقا ءتوراعاسى رايىمبەك باتالوۆ.