رەسمي ستاتيستيكالىق مالىمەتتەرگە سايكەس، بيىلعى قاڭتار-ماۋسىم ارالىعىندا 3 ملن 431 مىڭ قازاقستاندىق ەل ىشىندە ساياحاتتاعان. ىشكى تۋريستەر سانى وتكەن جىلدىڭ سايكەس كەزەڭىمەن سالىستىرعاندا 349 مىڭ ادامعا كوبەيگەن. 2023 جىلى بۇل كورسەتكىش 3 ملن 082 مىڭ ادامعا جەتكەن ەدى، دەپ حابارلايدى aqshamnews.kz.
الماتى، استانا جانە شىمكەنت قالالارى جالپى تۋريستەر ۇلەسىنىڭ 51%-ىن تارتا وتىرىپ، ىشكى تۋريستىك باعىتتار اراسىندا كوشباسشى بولىپ تۇر. سونداي-اق وتكەن جىلدىڭ ءبىرىنشى جارتىجىلدىعىمەن سالىستىرعاندا قازاقستاننىڭ 14 وڭىرىندە تۋريستەر سانىنىڭ وسكەنى بايقالدى.
«جىل وتكەن سايىن ەلىمىزدە ىشكى تۋريزمگە دەگەن سۇرانىستىڭ ارتىپ كەلە جاتقانى بايقالادى. مۇنى رەسمي ستاتيستيكاداعى كورسەتكىشتەر ايعاقتايدى. ماسەلەن، بيىلعى التى ايدا 3،5 ميلليونعا جۋىق تۋريست ەل ىشىندە ساياحات جاسادى. وتكەن جىلمەن سالىستىرعاندا ناتيجە ايتارلىقتاي جاقسارعان. بۇل – تۋريستىك ينفراقۇرىلىم مەن قىزمەت كورسەتۋ ساپاسىن جاقسارتۋ باعىتىنداعى ماقساتتى جۇمىسىمىزدىڭ ناتيجەسى ەكەنىن ايتا كەتكەن ءجون. الداعى ۋاقىتتا دا تۋريستەر سانىن ارتتىرۋ ءۇشىن وسى سالاداعى سەرپىندى جۇمىسىمىزدى جالعاستىرامىز»، - دەپ اتاپ ءوتتى ق ر تسم تۋريزم يندۋسترياسى كوميتەتى ءتوراعاسى نۇرتاس كارىپبايەۆ.