قالاارالىق جولاۋشىلاردى تاسىمالدايتىن تاكسي قىزمەتىنە تالاپ قاتاڭداي تۇسپەك، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جول قاۋىپسىزدىگىن قامتۋداعى تاعى ءبىر پروبلەما – جولاۋشىلاردى زاڭسىز تاسىمالداۋشىلار (يندرايۆەر، ياندەكس تاكسي قىزمەتى). تاكسيستەر پايدا تابۋ ءۇشىن توقتاۋسىز، ۇيقىسىز جانە دەمالىسسىز قالالار اراسىندا قاتىنايدى. جول قاۋىپسىزدىگى ءۇشىن بۇل – ءقاۋىپتى. كەيبىر كولىكتەر توزعان، ۇزاق جولعا شىدامايدى. تاكسي جۇرگىزۋشىلەرى ادامداردى تاسىمالداۋدا جول ەرەجەلەرى تالاپتارىن ورىندامايدى»، - دەدى ىشكى ىستەر ءبىرىنشى ۆيسە-مينيسترى مارات قوجايەۆ ۇكىمەت وتىرىسىندا.
وسى ورايدا مينيسترلىك زاڭسىز تاسىمالدايتىن قالاارالىق تاكسي جۇرگىزۋشىلەرىنە تالاپتى كۇشەيتپەك.
«جولعا شىعار الدىندا مەديسينالىق جانە كۇندەلىكتى اۆتوكولىكتى تەكسەرۋ، جىلىنا 2 رەت - تەحنيكالىق بايقاۋدان ءوتۋ، سونداي-اق جۇرگىزۋشىنىڭ رولدە 8 ساعاتتان ارتىق وتىرماۋىن قاراستىرۋ كەرەك»، - دەيدى ول.