ەلىمىزدە جول ۇستىندە كۇنىنە ورتا ەسەپپەن 5-6 ادام قازا تابادى.
مۇنداي دەرەك ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا كەلتىرىلدى، دەپ حابارلايدى Almaty-akshamy.kz.
وتىرىستا جول قوزعالىسى قاۋىپسىزدىگىن قامتاماسىز ەتۋ شارالارى قارالدى.
ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ بيىل جول-كولىك وقيعالارىنىڭ نەگىزگى كورسەتكىشتەرىنىڭ تومەندەگەنىن ايتتى: جول-كولىك وقيعالارى – 13%-عا (8 253-تەن 9 429-عا)، زارداپ شەككەندەر سانى – 16%-عا (12 394-تەن 10 448-گە دەيىن)، قازا تاپقاندار – 1%-عا (1478-دەن 1468-گە دەيىن). دەگەنمەن، جالپى وڭ ديناميكاعا قاراماستان، الماتى قالاسى، جامبىل، تۇركىستان، الماتى، جەتىسۋ وبلىستارىندا اپاتتار دەڭگەيى ءالى دە جوعارى.
سونىمەن قاتار بيىل 5،5 ملن-نان استام جول قوزعالىسى ەرەجەسىن بۇزۋعا توسقاۋىل قويىلعانى، 15 مىڭعا جۋىق ماس كۇيدەگى جۇرگىزۋشى ۇستالعانى، 9 مىڭ ادامنىڭ كولىك جۇرگىزۋ قۇقىعىنان ايىرىلعانى، 15 مىڭ ادامنىڭ اكىمشىلىك قاماۋعا الىنعانى، 215 مىڭنان استام جاياۋ جۇرگىنشىگە ايىپپۇل سالىنعانى اتالىپ ءوتتى.
مارات قوجايەۆ ءىىم-نىڭ ەمتيحانداردى قابىلداۋ ەرەجەسىنە وزگەرىستەر ەنگىزگەنىن اتاپ ءوتتى: ەندى ەمتيحان تاپسىرۋ پروسەسى ونلاين-ترانسلياسيا ارقىلى باقىلانادى، «اۆتومەكتەپ» اقپاراتتىق جۇيەسىندە ءبىلىم الۋشىلاردى مىندەتتى تىركەۋ نورماسى ەنگىزىلدى. ناتيجەسىندە تىزىمدەردى تۇزەتۋ مۇمكىندىگى الىنىپ تاستالادى.
قازىرگى ۋاقىتتا تۇزەتۋلەردىڭ ەكىنشى پاكەتى ازىرلەندى. دايىندىق كۋرستارىن اياقتاۋ تۋرالى كۋالىكتەردى جانە مەديسينالىق انىقتامالاردى ەلەكتروندىق نىسانعا كوشىرۋ جوسپارلانۋدا. سونىمەن قاتار جۇرگىزۋشىلەردىڭ ءوز بەتىنشە دايىندالۋىن الىپ تاستاۋ ماسەلەسى پىسىقتالۋدا.
بۇدان بولەك، اكىمدىكتەردىڭ قولداۋىمەن جول قوزعالىسى قاۋىپسىزدىگىن قامتاماسىز ەتۋ سالاسىنا سيفرلىق شەشىمدەردىڭ بەلسەندى تۇردە ەنگىزىلىپ جاتقانى ايتىلدى. ءقازىر جولداردا جول ەرەجەسىن بۇزعانداردى اۆتوماتتى تۇردە تىركەيتىن 22 مىڭ كامەرا ورناتىلعان. ولاردىڭ كومەگىمەن بارلىق بۇزۋشىلىقتاردىڭ 50%-ى تىركەلەدى. استانا مەن شىمكەنتتە بۇل كورسەتكىش 70%-عا دەيىن ءوستى. مۇنداي جۇيەلەردى وڭىرلەردە ەنگىزۋ جۇمىستارى جالعاسىپ جاتىر.
سونىمەن قاتار «قورعاۋ» باعدارلاماسى ارقىلى تۇراقتى تۇردە ءتارتىپ بۇزاتىندارعا شارا قولدانىلۋدا. ول جالعان ءنومىرلى، ساقتاندىرۋسىز، ىزدەۋدە جۇرگەن نەمەسە جول ەرەجەسىن بۇزىپ، ايىپپۇل تولەۋدەن جالتارعان كولىك جۇرگىزۋشىلەرىن اۆتوماتتى تۇردە انىقتاۋعا مۇمكىندىك بەرەدى.
سونداي-اق توتەنشە جاعدايلار ءمينيسترى سىرىم ءشارىپحانوۆ پەن كولىك ءمينيسترىنىڭ مىندەتىن اتقارۋشى تالعات لاستايەۆ بايانداما جاسادى.
پرەمەر-مينيستر الماتى وبلىسىندا جول ۇستىندەگى ءولىم-جىتىم كورسەتكىشى ەڭ جوعارى، تۇركىستان وبلىسىندا جول-كولىك وقيعالارى، قازا تاپقاندار مەن زارداپ شەككەندەر سانى ارتقانىن، ال اباي وبلىسىندا جالپى اپات دەڭگەيىنىڭ 2 ەسەگە جۋىق وسكەنىن اتاپ ءوتتى. وسى ماسەلەلەر بويىنشا وبلىس اكىمدەرى مارات سۇلتانعازييەۆ، دارحان ساتىبالدى جانە نۇرلان ۇرانحايەۆ تۇسىنىكتەمە بەردى.
ۇكىمەت باسشىسى بيىل جول-كولىك وقيعالارى مەن زارداپ شەككەندەردىڭ سانى ءبىرشاما تومەندەگەنىن اتاپ ءوتتى. دەسە دە جول ۇستىندە كۇنىنە ورتا ەسەپپەن 5-6 ادام قازا تابادى.
«ءار سيفردىڭ ارتىندا قانشاما جاننىڭ ءومىرى مەن دەنساۋلىعى تۇر. وكىنىشكە قاراي، بىزدە كولىك جۇرگىزۋ مادەنيەتى مەن ءتارتىپ دەڭگەيى وتە تومەن. ءبىز جولداعى قۇقىق بۇزۋشىلىقتار ءۇشىن قىلمىستىق جانە اكىمشىلىك جاۋاپكەرشىلىكتى قاتاڭداتىپ كەلەمىز. سوعان قاراماستان، پوليسيا جول بويىندا ماس كۇيدە رولگە وتىرعان جانە بۇرىن كولىك جۇرگىزۋ قۇقىعىنان ايىرىلعان مىڭداعان جۇرگىزۋشىنى ۇستايدى. ارينە، مۇنداي زاڭ بۇزۋشىلارعا بارىنشا قاتاڭ شارا قولدانۋ كەرەك»، — دەدى ءاليحان سمايىلوۆ.
ونىڭ ايتۋىنشا، ەلدى مەكەندەردەگى كامەرالار سانىن كوبەيتىپ، رەسپۋبليكالىق ماڭىزى بار اۆتوجولداردا اپپاراتتىق-باعدارلامالىق كەشەندەردى بەلسەندى پايدالانۋ كەرەك.
پرەمەر-مينيستر جول قاۋىپسىزدىگىنە قاتىستى جاعداي حالىقتىڭ ورىندى نارازىلىعىن تۋدىرىپ وتىرعانىن اتاپ ءوتتى. جىل باسىنان بەرى ازاماتتاردان جول قوزعالىسىنا قاتىستى 62 مىڭنان استام رەسمي شاعىم كەلىپ ءتۇستى. ولاردىڭ ءبارى الدىڭعى توپ-10 شاعىمدار قاتارىندا تۇر.
ماسەلەن، جۇرگىزۋشى كۋالىگىن الۋ ەمتيحاندارىن تاپسىرۋ كەزىندەگى جەمقورلىق ارەكەتتەرى دە قوعام تاراپىنان ءجيى سىنعا ۇشىرايدى. اۆتوكولىك قۇرالدارىن تەحنيكالىق تەكسەرۋ ساپاسىنا قاتىستى سۇراقتار كوپ. سونداي-اق جول-كولىك اپاتتارىنا سەبەپشى نەگىزگى ماسەلەنىڭ ءبىرى – ءتيىستى دەڭگەيدەگى جول ينفراقۇرىلىمىنىڭ بولماۋى.
«ءالى كۇنگە دەيىن ەلدى-مەكەندەردە جارىعى، جاياۋ جۇرگىنشىلەر وتەتىن جەرلەرى مەن باعدارشامدارى جوق جول ۋچاسكەلەرى كەزدەسەدى. وسىنىڭ ءبارى قايعىلى جاعدايلارعا، ونىڭ ىشىندە بالالار اراسىنداعى ولىم-جىتىمگە اكەپ سوعۋدا. سوندىقتان، جول قاۋىپسىزدىگىن ارتتىرۋ، جول اپاتتارى مەن ءولىم-جىتىم دەڭگەيىن ازايتۋ جونىندەگى جۇيەلى شارالاردى ازىرلەۋ ءبىزدىڭ باستى مىندەتىمىز بولىپ تابىلادى»، — دەدى ءاليحان سمايىلوۆ.
وسىعان بايلانىستى ۇكىمەت باسشىسى ءاربىر ءوڭىر بولىنىسىندە جول اپاتتارىنا جان-جاقتى تالداۋ جۇرگىزۋدى جانە جول اپاتتارى ءجيى بولاتىن ۋچاسكەلەردە جول قوزعالىسىن قاداعالاۋدى كۇشەيتۋدى تاپسىردى.
«سونداي-اق جۇرگىزۋشىلەردىڭ ءوز بەتىنشە دايىندالۋ مۇمكىندىگىن الىپ تاستاۋ ماسەلەسىن پىسىقتاۋ قاجەت. بۇل قادام ءتيىستى ناتيجە بەرگەن جوق. سيفرلاندىرۋ مينيسترلىگىمەن بىرلەسىپ، جۇرگىزۋشى كۋالىگىن الۋ ەمتيحاندارىنىڭ ساپالى وتكىزىلۋىن قامتاماسىز ەتۋ كەرەك»، — دەدى ءاليحان سمايىلوۆ.
قورىتىندىلاي كەلە، ول جەكەمەنشىك تاكسيدىڭ، اسىرەسە قالاارالىق باعىتتارداعى تاكسي قىزمەتىن رەتتەۋ جونىندە قوسىمشا شارالار قابىلداۋدى، كولىك قۇرالدارىن تەحنيكالىق تەكسەرۋدەن وتكىزۋ ساپاسىن ءتيىمدى باقىلاۋ مەحانيزمىن ازىرلەۋدى، زاڭ بۇزۋشىلىقتاردى تىركەۋ كامەرالارىنىڭ سانىن كوبەيتۋ جانە تراسسالىق مەديسينالىق-قۇتقارۋ پۋنكتتەرىن دامىتۋ، ونىڭ ىشىندە ءموبيلدى جىلجىمالى بريگادالار قۇرۋ جونىندە شارالار قابىلداۋدى تاپسىردى.