يندونەزيادا فۋتبول ماچىندا بولعان قاقتىعىس سالدارىنان كەم دەگەندە 174 ادام قازا تاپتى. تاعى 11 ادام اۋىر جاراقات الدى. ستاديوندا زارداپ شەككەندەردىڭ قالعان بولىگى اۋرۋحانادا جاتىر، دەپ حابارلايدى Almaty-akshamy.kz Inform.kz-كە سىلتەمە جاساپ.
قۇربان بولعاندار سانى ارتۋى مۇمكىن. قازا تاپقاندار تۋرالى مالىمەتتەردى جينايتىن شىعىس ياۆا تابيعي اپاتتار سالدارىن جويۋ اگەنتتىگى سوڭعى ەكى ساعاتتا قۇربان بولعاندار سانىنىڭ ارتقانىن حابارلاپ، ساعات سايىن كورسەتكىشتى جاڭارتىپ وتىر.
بۇعان دەيىن يندونەزيا ستاديونىنداعى تارتىپسىزدىك كەزىندە 127 ادام مەرت بولدى.
قايعىلى جاعداي مالانگ قالاسىنداعى ستاديوندا جەرگىلىكتى «ارەما» كلۋبى مەن شىعىس ياۆا پروۆينسياسىنىڭ اكىمشىلىك ورتالىعى سۋرابايداعى «پەرسەبايا» كومانداسى اراسىنداعى ويىن كەزىندە بولدى.
ماچ 3-2 ەسەبىمەن قوناقتاردىڭ جەڭىسىمەن اياقتالدى. سوڭعى ىسقىرىقتان كەيىن «ارەمانىڭ» مىڭداعان جانكۇيەرى الاڭعا جۇگىرىپ شىققان، سودان قاقتىعىستار باستالعان.
پوليسيا كوزدەن جاس اعىزاتىن گاز قولدانعان. دارىگەرلەردىڭ ايتۋىنشا، ءولىم جاعدايلارىنىڭ كوبىنە تۇنشىعۋ سەبەپ بولعان.
ستاديوننىڭ سىرتىندا دا تارتىپسىزدىك جالعاسىپ، بىرنەشە پوليسيا كولىگىن ورتەپ جىبەرگەن. ەكى پوليسيا قىزمەتكەرى دە قازا تاپتى.
بيلىك تەرگەۋدى باستادى. يندونەزيا فۋتبول فەدەراسياسى «ارەماعا» ماۋسىمنىڭ سوڭىنا دەيىن ماچ وتكىزۋگە تىيىم سالدى جانە الداعى بارلىق ويىندى ءبىر اپتاعا كەيىنگە شەگەردى.
فوتو: dw.com