قازاقستاندا العاش رەت ونكولوگتار 3D تەحنولوگيانىڭ كومەگىمەن جامباس سۇيەگىن قايتا جاڭارتۋ وپەراسياسىن جاسادى، دەپ حابارلايدى Almaty-akshamy.kz Inform.kz-كە سىلتەمە جاساپ.
وپەراسيا قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ سۇيەكتەردىڭ، جۇمساق تىندەردىڭ جانە مەلانومالاردىڭ ىسىكتەرى ورتالىعىندا بولدى.
23 جاستاعى ناۋقاسقا «حوندروساركوما» دياگنوزى قويىلعان.
«ناۋقاسقا ينستيتۋتتا مۋلتيديسيپلينارلىق دارىگەرلەر توبى كەڭەس بەردى. بۇرىن بۇنداي جاعدايلاردا حيرۋرگتار جامباس سۇيەكتەرىنىڭ زاقىمدالعان ايماعىن الىپ تاستاۋعا ءماجبۇر بولدى. بۇل جامباس قۋىسىنىڭ تۇتاستىعىن بۇزادى، ادامنىڭ ءجۇرىسىنىڭ بۇزىلۋىنا، ناۋقاس ومىرتقاسىنىڭ قيسايۋىنا اكەلەدى. ءبىراق ەمدەلۋشىنىڭ جاسىن ەسكەرە وتىرىپ، ونكوحيرۋرگتار ءوز الدىنا ىسىكتى الىپ تاستاپ قانا قويماي، ناۋقاستىڭ ءومىر ساپاسىن دا ساقتاپ قالۋ ماقساتىن قويدى»، - دەدى ونكوحيرۋرگ، قازاق ونكولوگيا جانە راديولوگيا عىلىمي-زەرتتەۋ ينستيتۋتى سۇيەكتەردىڭ، جۇمساق تىندەردىڭ جانە مەلانوما ىسىكتەرى ورتالىعىنىڭ باسشىسى عاني سەرىكبايەۆ.
وسى جوبانى ىسكە اسىرۋ ءۇشىن Coln3d (گونكونگ، جۇڭگو) كومپانياسىمەن ۇزاقمەرزىمدى مەموراندۋم جاسالدى. ناۋقاستىڭ كت-دەرەكتەرى گونكونگقا جىبەرىلدى.
گونكونگتا 3D-باسىپ شىعارۋ ارقىلى كوبالت-حروم قورىتپاسىنان ارنايى پروتەز جاسالدى.
وپەراسيا 2022 جىلدىڭ قىركۇيەك ايىندا قازوجرعزي-دا ءوتتى. وپەراسيا بارىسىندا پاسيەنتتىڭ قىر-مىقىن سۇيەگىنىڭ قاناتى، سونداي-اق ىسىكتەن زارداپ شەككەن جۇمساق تىندەر الىنىپ تاستالدى.
جامباس قۋىسىن قالپىنا كەلتىرۋ ءۇشىن كومپيۋتەرلىك جانە 3D تەحنولوگيالاردى قولدانا وتىرىپ، جەكە مالىمەتتەر بويىنشا جاسالعان جەكە ەندوپروتەزبەن جامباس سۇيەكتەرىن قايتا جاسالدى. وتا 3 ساعاتقا سوزىلدى.
ناۋقاستىڭ وتادان كەيىنگى كەزەڭى جاقسى ءوتىپ جاتىر، ناۋقاس وپەراسيادان كەيىن بەسىنشى كۋنى بەلسەندى بولدى.