"كەلگەن بويدا بەرىلەتىن ۆيزا" يندونەزيادا 30 تاۋلىك ىشىندە بولۋعا مۇمكىندىك بەرەدى.
قازاقستاننىڭ يندونەزياداعى ەلشىلىگى يندونەزياعا بارۋعا نيەتتەنىپ وتىرعان قازاقستان ازاماتتارى ءۇشىن "كەلگەن بويدا بەرىلەتىن ۆيزا" الۋ مۇمكىندىگىن پىسىقتادى، دەپ حابارلايدى Almaty-akshamy.kz ق ر ءسىم باسپا ءسوز قىزمەتىنە سىلتەمە جاساپ.
يندونەزيانىڭ زاڭدار جانە ادام قۇقىقتارى مينيسترلىگىنىڭ كوشى-قون جونىندەگى باس ديرەكتوراتى 2023 جىلعى 18 قاڭتاردان باستاپ قازاقستان ازاماتتارى اتالعان ۆيزا ءتۇرىن الۋعا قۇقىلى ەلدەر تىزىمىنە ەنگىزدى.
"كەلگەن بويدا بەرىلەتىن ۆيزانى" يندونەزياعا ۇشىپ كەلگەندە اۋەجايدا نەمەسە molina.imigrasi.go.id سايتىندا يندونەزياعا ۇشپاس بۇرىن راسىمدەۋگە بولادى. ول ءۇشىن تومەندەگى قۇجاتتاردىڭ بولۋى تالاپ ەتىلەدى:
- شەكارادان ءوتۋ ساتىندە قولدانىلۋ مەرزىمى كەمىندە 6 ايدى قۇرايتىن پاسپورت؛
- كەرى اۋە بيلەتى نە ءۇشىنشى ەلگە ۇشۋ ءۇشىن الىنعان اۋە بيلەتى؛
- كوروناۆيرۋس ينفەكسياسىنا قارسى ۆاكسيناسيا سەرتيفيكاتى (كەم دەگەندە ەكى دوزا قاجەت)، بۇل رەتتە ەكىنشى كومپونەنتپەن ۆاكسيناسيالاۋ شەكارانى ناقتى كەسىپ ءوتۋ كۇنىنە دەيىن كەمىندە 14 تاۋلىك بۇرىن جۇرگىزىلگەن بولۋى ءتيىس. بۇل تالاپ 18 جاسقا تولعان تۇلعالارعا قولدانىلادى. 18 جاسقا تولماعاندار ءۇشىن ۆاكسيناسيا سەرتيفيكاتىنىڭ بولۋى تالاپ ەتىلمەيدى.
"كەلگەن بويدا بەرىلەتىن ۆيزانىڭ" قۇنى 500 مىڭ يندونەزيا ءرۋپيىن (شامامەن 35 اقش دوللارى) قۇرايدى.
ۆيزا اۋەجايدا راسىمدەلگەن جاعدايدا ۆيزالىق الىمدى تولەۋ "Bank Rakyat Indonesia" ۇستەلىندە جۇزەگە اسىرىلادى (اقش دوللارىمەن دە، يندونەزيالىق رۋپيامەن دە تولەۋگە بولادى).
"كەلگەن بويدا بەرىلەتىن ۆيزا" يندونەزيادا 30 تاۋلىك ىشىندە بولۋعا مۇمكىندىك بەرەدى، ونى تۇرۋ ورنى بويىنشا ورنالاسقان كوشى-قون قىزمەتى بولىمشەسىندە ءدال وسىنداي مەرزىمگە ءبىر رەت ۇزارتۋعا بولادى.