الماتىدا جەكسەمبەك ەركىمبەكوۆكە ارنالعان ەسكەرتكىش تاقتا اشىلدى

ول 1976-1987 جىلدارى مادەنيەت ءمينيسترى قىزمەتىن ابىرويمەن اتقاردى.

الماتىدا قازاق ونەرى مەن مادەنيەتىنە سۇبەلى ۇلەس قوسقان مەملەكەت جانە قوعام قايراتكەرى جەكسەمبەك ەركىمبەكوۆكە ارنالعان ەسكەرتكىش تاقتا اشىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.

سالتاناتتى جيىنعا قايراتكەردىڭ جاقىندارى، زيالى قاۋىم وكىلدەرى مەن مادەنيەت جاناشىرلارى قاتىستى. ەسكەرتكىش تاقتا پروفەسسوردىڭ 1972 جىلدان بەرى سوڭعى كۇنىنە دەيىن تۇرعان ءۇيىنىڭ ىرگەسىنە قويىلدى.

«ول كىسى وتە ءبىر مادەنيەتتى، شىنىندا دا مادەنيەت ءمينيسترى بولۋعا لايىق ادام ەدى. مىنەزى وتە بيازى، ەشكىمگە قاتتى سويلەمەيتىن. جاقسى ازامات بولعان. جاڭا قازاقستاندا وسى كىسىنىڭ ونەگەسى، تازالىعى بالالارعا، ۇرپاققا ونەگە بولا ما دەپ ويلايمىن»، – دەدى د. قونايەۆ اتىنداعى ەۋرازيالىق زاڭ اكادەمياسىنىڭ رەكتورى ءومىرالى جالايري.

الماتى وبلىسىنىڭ ەسكەلدى اۋدانىندا تۋعان جەكسەمبەك ەركىمبەكوۆ ەڭبەك جولىن قازاق راديو كوميتەتى جانىنداعى ۇلت-اسپاپتار وركەسترىندە، قۇرمانعازى اتىنداعى وركەستردە دومبىراشى بولىپ باستاعان. كەيىننەن حورەوگرافيا ۋچيليششەسىنىڭ، بي ءانسامبلىنىڭ، ورتالىق كوميتەتتە مادەنيەت ءبولىمىنىڭ جەتەكشىسى بولدى. 1976-1987 جىلدارى مادەنيەت ءمينيسترى قىزمەتىن ابىرويمەن اتقاردى. مينيستر بولعان تۇسىندا جاڭا تەاترلار، فيلارمونيالار، كىتاپحانالار، مادەني ورتالىقتار مەن اۆتومۋزەيلەر اشىلدى.

«مينيستر بولعان كەزىندە قازاق ونەرى مەن مادەنيەتى ەرەكشە دامىدى. ونى بار قازاق، بۇكىل الاش جۇرتى بىلەدى. قانشاما دارىندى تالانتتاردىڭ وسۋىنە، مىقتى ونەر قايراتكەرلەرىنىڭ جۇزدىزى جانۋىنا جول اشتى. ەڭ الدىمەن، ول وتە ادال ادام بولاتىن»، – دەدى اقىن امىرە ءارىن.