وزگەرىس زاڭعا 2021 جىلى ەنگىزىلگەن بولاتىن
قازاقستانعا ساياحاتتاپ كەلگەندەردەن الىنعان تۋريستىك جارنا ينفراقۇرىلىمدى جاقسارتىپ، ەلدى جارنامالاۋعا جۇمسالادى. مادەنيەت جانە سپورت ۆيسە-مينيسترى ەرجان ەركىنبايەۆ مالىمدەگەندەي، بيىل شەتەلدىكتەردەن 2 جارىم ميلليارد تەڭگە قوسىمشا قاراجات جينالۋى مۇمكىن، دەپ حابارلايدى Almaty-akshamy.kz Almaty.tv-گە سىلتەمە جاساپ.
نەگىزى مۇنداي وزگەرىس زاڭعا 2021 جىلى ەنگىزىلگەن بولاتىن. ءبىراق الەمدى جايلاعان پاندەميا سالدارىنان ونى ءىس جۇزىندە جۇزەگە اسىرۋ تەك بيىل قولعا الىندى
1 قاڭتاردان باستاپ قازاقستانعا ساياحاتتاپ كەلگەن ءار شەتەلدىك ازاماتتان تۋريستىك جارنا الىنادى. ياعني، ولار قوناق ۇيدە تۇرۋ قۇنىنان بولەك، قوسىمشا تولەم جاساۋى ءتيىس.
«باستامانىڭ ءوزى، ءتۇسىنىپ قاراساڭىز، ەلگە قوسىمشا تابىس اكەلۋگە سەپتىگىن تيگىزەدى. تۋريستەرگە سالىق سالۋ - الەمنىڭ دامىعان ەلدەرىندە بۇرىننان بار ءۇردىس. ونىڭ ۇستىنە، تۇسكەن قاراجات ينفراقۇرىلىمدى، وتاندىق ءتۋريزمدى دامىتۋعا جۇمسالماق»، – دەدى قوناق ءۇيدىڭ باس مەنەدجەرى ارسەنيي تاگايەۆ.
ايتا كەتسەك، الماتىداعى تۋريستىك جارنا مولشەرى قوناق ۇيگە تولەنەتىن قۇننىڭ 5 پايىزى كولەمىندە بەكىتىلدى. ساراپشىلار بولجاۋىنشا، بيىل شەتەلدەن كەلەتىندەر سانى 400 مىڭ ادامنان اسادى. ال ولاردان تۋريستىك جارنا جينالسا، تۇسەتىن قاراجات مولشەرى - 2 ملرد 342 ملن تەڭگەنى قۇراماق.
«ساياحاتتاپ جۇرگەن تۋريستەر مۇنىمەن تانىس. مىسالى، ءبىز دە وزگە ەلگە بارساق، ەش قارسىلىقسىز، جارنا تولەيمىز. قوسا كەتەتىنى، مۇنداي سوما اۋە جولىنا، قوناق ۇيگە تولەنەتىن اقشامەن سالىستىرساق، قىمبات دەۋگە دە كەلمەيدى»، – دەدى «قازاقستان قوناق ۇيلەر جانە مەيرامحانالار» قاۋىمداستىعىنىڭ پرەزيدەنتى راشيدا شايكەنوۆا.
تۋريستىك جارنا كولەمىن شەتەلدىكتەردىڭ كەلۋىنە قاراي ءار ءوڭىر ءوزى انىقتايدى. تەك مولشەرى 1%-دان كەم بولماۋى كەرەك. ايتا كەتەتىنى، بۇل ەرەجە جاتاقحانا يەلەرىنە نەمەسە جالعا بەرۋشىلەرگە قولدانىلمايدى.