پرەمەر-مينيستر ولجاس بەكتەنوۆ زاڭسىز يمپورتتىڭ الدىن الۋ ءۇشىن زاڭداعى ولقىلىقتاردى جويۋدى جانە «كولەڭكەلى» يمپورتقا جول بەرمەۋ ءۇشىن ءبىرقاتار شارالاردى قابىلداۋدى تاپسىردى، دەپ حابارلايدى aqshamnews.kz
ۇكىمەت باسشىسى بەيىندى مينيسترلىكتەرگە تاۋارلاردىڭ بىرنەشە كاتالوگتارىن ساراپتاپ، ولاردىڭ ارتىقتارىن جويۋدى مىندەتتەدى. بۇل قادام ءونىمدى ءبىر كاتالوگ ارقىلى يمپورتتاپ، باسقا كاتالوگپەن وتاندىق ءونىم رەتىندە وتكىزۋگە مۇمكىندىك بەرەتىن زاڭسىز سحەمالاردى بولدىرماۋعا باعىتتالعان.
قارجى مينيسترلىگى حالىقارالىق ستاندارتتاردى ەسكەرە وتىرىپ، مەملەكەتتىك ساتىپ الۋدى جۇزەگە اسىرۋ ءۇشىن تاۋارلاردىڭ ەلەكتروندىق كاتالوگىن جاساعان. ەندى قارجى مينيسترلىگى ساۋدا مينيسترلىگىمەن جانە باسقا دا مۇددەلى مەملەكەتتىك ورگاندارمەن بىرلەسىپ، ارتىق كاتالوگتاردى جويۋعا جاۋاپتى بولادى.
سونىمەن قاتار، پرەمەر-مينيستر قازاقستاندا وتاندىق ونىمدەر بولا تۇرا، يمپورتتىق تاۋارلاردى ساتىپ الۋ تاجىريبەسىن توقتاتۋ قاجەتتىگىن اتاپ ءوتتى. ول ونەركاسىپ مينيسترلىگىنە مەملەكەتتىك ورگاندارمەن جانە ۇيىمدارمەن بىرلەسىپ، وتاندىق شيكىزات پەن ماتەريالداردى پايدالانۋ بويىنشا ءىرى مەردىگەر كومپانيالاردىڭ مىندەتتەمەلەرىنە مونيتورينگ جۇرگىزۋدىڭ ءتيىمدى تەتىگىن ازىرلەۋدى تاپسىردى.