ءىلياس وسەروۆ: قالا اكىمدىگى زارداپ شەككەن بيزنەسكە قارجىلاي جانە وزگە دە قولداۋ شارالارىن پىسىقتاۋدا

الماتىدا تارتىپسىزدىك كەزىندە زارداپ شەككەن شاعىن جانە ورتا بيزنەس نىساندارىنا كەلتىرىلگەن زالالدى انىقتاۋ جونىندەگى كوميسسيا جۇمىسىن جالعاستىرۋدا.

بۇل تۋرالى وڭىرلىك كوممۋنيكاسيالار قىزمەتىنىڭ ونلاين-بريفينگىندە قالا اكىمىنىڭ ورىنباسارى ءىلياس وسەروۆ مالىمدەدى، دەپ حابارلايدى Almaty-akshamy.kz

«54 اكىمشىلىك عيمارات پەن قۇرىلىس 15،6 ملرد تەڭگەگە زارداپ شەكتى. پوليسيانىڭ، ءورت سوندىرۋشىلەردىڭ جانە باسقا دا مەملەكەتتىك ۇيىمداردىڭ ماتەريالدىق-تەحنيكالىق بازاسىن قالپىنا كەلتىرۋ ءۇشىن شامامەن 8،6 ملرد تەڭگە قاجەت بولادى. قۇقىق قورعاۋ ورگاندارى مەن كوممۋنالدىق قىزمەتتەردىڭ 260 كولىك قۇرالى، 2،1 ملرد تەڭگە سوماعا جەكە جانە زاڭدى تۇلعالاردىڭ 155 ءاۆتوموبيلى بۇلىنگەن نەمەسە ورتەنگەن»، - دەپ حابارلادى ءىلياس وسەروۆ.

ونىڭ ايتۋىنشا، قالادا 1600-گە جۋىق بيزنەس سۋبەكتىسى 66،5 ملرد تەڭگەگە زارداپ شەككەن.

ۇكىمەتتىك كوميسسيا زارداپ شەككەن شوب سۋبەكتىلەرىنە كەلتىرىلگەن زالالدى وتەۋ تەتىگىنىڭ جوباسىن ازىرلەدى. ءى.وسەروۆتىڭ ايتۋىنشا، قالا اكىمدىگى قارجىلىق جانە وزگە دە قولداۋ شارالارىن پىسىقتاۋدا.

اكىمنىڭ ورىنباسارى Open Almaty قوعامدىق قابىلداۋ بولمەسىنىڭ بازاسىندا جەدەل جەلى جۇمىس ىستەيتىنىن ەسكە سالدى: 1308 جانە قالالىق 338-33-88.