بۇل تۋرالى اسحات ايماعامبەتوۆ ءوزىنىڭ Facebook-تەگى پاراقشاسىندا جازدى.
مينيستر الماتىعا جۇمىس ساپارى بارىسىندا «عىلىم وردا» ورتالىعىندا بولىپ، عىلىمي كىتاپحانانىڭ، مۇراعاتتىڭ، سيرەك باسىلىمدار قويماسىنىڭ جۇمىسىمەن تانىستى، دەپ حابارلايدى Almaty-akshamy.kz
ورتالىقتىڭ قۇندىلىعى ەرەكشە، سەبەبى وندا ءبىزدىڭ عىلىمي جانە مادەني مۇرامىز، وتاندىق عالىمداردىڭ عىلىمي-زەرتتەۋ جانە اعارتۋشىلىق جۇمىستارى ساقتالعان.
«الماتى تراگەدياسى» كەزىندە بولعان وقيعالاردى ەسكەرە وتىرىپ، وسىنداي وتە قۇندى قورلاردىڭ ساقتالۋىن قامتاماسىز ەتۋ وتە وزەكتى. ولاردى سيفرلاندىرۋدى جۇرگىزۋ، رەزەرۆتىك كوشىرمەلەر جاساۋدى، كاتالوگتاندىرۋدى، قىزمەتكەرلەردى وقىتۋدى، قولجازبالاردى جانە باسقا دا دەرەككوزدەردى عىلىمي اينالىمعا ەنگىزۋدى، ەجەلگى قۇجاتتاردى قالپىنا كەلتىرۋدى قامتاماسىز ەتۋ قاجەت، سونداي-اق وتكەن وقيعالار اياسىندا ولاردىڭ ساقتالۋ قاۋىپسىزدىگىن قامتاماسىز ەتۋ دە ماڭىزدى»، - دەپ جازدى ايماعامبەتوۆ.
ۆەدومستۆو باسشىسى ساپارىنىڭ قورىتىندىسى بويىنشا ارنايى ونەركاسىپتىك سكانەرلەردى، توزعان قۇندى كىتاپتار مەن ەجەلگى قولجازبالاردى قالپىنا كەلتىرۋگە ارنالعان زەرتحانالىق جابدىقتاردى، ساقتاۋعا ارنالعان ارنايى سورەلەر مەن جاشىكتەردى، سونداي-اق قويمالاردى قاجەتتى تەمپەراتۋرالىق جاعدايلارمەن قامتاماسىز ەتۋگە ارنالعان جابدىقتاردى ساتىپ الۋعا قاراجات ءبولۋ تۋرالى شەشىم قابىلدانعانىن حابارلادى.
«سونداي-اق، عالىمدارمەن بىرگە ءبىز عىلىمي ورتالىقتىڭ جۇمىسىن جاڭا دەڭگەيگە كوتەرۋ ماسەلەسىن تالقىلادىق. ءوز تاراپىمنان مينيسترلىك عىلىمي جۇمىستاردى سيفرلاندىرۋ، بىلىكتى مامانداردى تارتۋ، ۇلتتىق مۇراعات قورى ماتەريالدارىنىڭ رەزەرۆتىك كوشىرمەلەرىن جاساۋ جانە جالپى وسى ورتالىقتىڭ بارلىق وزەكتى ماسەلەلەرىن شەشۋ ماسەلەلەرىن باقىلاۋعا الاتىنىمىزدى اتاپ وتكىم كەلەدى»، - دەپ جازدى مينيستر.