ءىىم تەرروريزم اكتىسى تۋرالى جالعان حابارلاما ءۇشىن جاۋاپكەرشىلىك قاراستىرىلاتىنىن ەسكە سالدى، - دەپ حابارلايدى aqshamnews.kz Polisia.kz سايتىنا سىلتەمە جاساپ.
"قۇرمەتتى ازاماتتار! سوڭعى كەزدە ءبىلىم بەرۋ مەكەمەلەرىندە ورناتىلعان جارىلعىش زاتتار تۋرالى جالعان حابارلامالار جيىلەپ كەتتى. بارلىق وسىنداي فاكتىلەر بويىنشا سوتقا دەيىنگى تەرگەۋ باستالدى. قاجەتتى تەرگەۋ ارەكەتتەرى جۇرگىزىلىپ جاتىر. ايتا كەتۋ كەرەك، مۇنداي قىلمىس جاساعان ادامدار اراسىندا كامەلەتكە تولماعاندار ءجيى كەزدەسۋدە. جىل باسىنان بەرى 168 قىلمىستىق ءىس قوزعالىپ، 31 ادام ۇستالدى، ونىڭ ىشىندە 12ء-سى كامەلەتكە تولماعان بالا. 13 ادام سوتتالدى، ونىڭ ىشىندە ەكەۋى ءجاسوسپىرىم. التى اتا-اناعا ايىپپۇل سالىندى"، - دەلىنگەن حابارلامادا.
ءىىم مالىمەتىنشە، ءاربىر جالعان حابارلاما تۇرعىندار اراسىندا ۇرەي تۋدىرىپ، مەكەمەلەردىڭ جۇمىسىنا كەدەرگى كەلتىرەدى. ولار ماتەريالدىق شىعىن اكەلىپ قانا قويماي، شۇعىل قىزمەتتەردىڭ ۋاقىتىن الادى. تەرروريزم اكتىسى تۋرالى جالعان حابارلاما ءۇشىن 5000 اەك-كە دەيىنگى ايىپپۇلدان باستاپ، 5 جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.
"بۇل قىلمىس ءۇشىن 14 جاستان باستاپ قىلمىستىق جاۋاپكەرشىلىك كوزدەلەدى. ەگەر كامەلەتكە تولماعاننىڭ جاسى 14 جاستان اسپاسا، وندا بۇل جاعدايدا ونىڭ اتا-اناسى تاربيەلەۋ بويىنشا مىندەتتەمەلەرىن اتقارماعانى ءۇشىن جاۋاپكەرشىلىككە تارتىلادى. بۇدان بولەك، سوت شەشىمىمەن اتا-انالار شۇعىل قىزمەتتەردىڭ شاقىرتۋعا شىعىپ، نىسانداردى تەكسەرۋگە كەتكەن شىعىنىن وتەۋگە مىندەتتەلەدى. ىشكى ىستەر مينيسترلىگى اتا-انالاردى بالالاردىڭ مىنەز-قۇلقىنا ەرەكشە نازار اۋدارۋعا شاقىرادى. جاسوسپىرىمدەرگە وسىنداي ارەكەتتەردىڭ سوڭى نەگە اكەلەتىنىن تۇسىندىرىڭىزدەر. تەرروريزم اكتىسى تۋرالى كوپە-كورىنەۋ جالعان حابارلامالار ءۇشىن قاتاڭ جازا قاراستىرىلاتىنىن ەسكە ساقتاڭىزدار. قوعامدىق ءتارتىپتى قامتاماسىز ەتۋ – بارشامىزدىڭ ورتاق مىندەتىمىز. بىرلەسىپ قانا، ءبىز بالالارىمىز ءۇشىن ءقاۋىپسىز ورتا قۇرا الامىز"، – دەدى دەپارتامەنت باستىعى – ءىىم رەسمي وكىلى شىڭعىس الەكەشيەۆ.