2024 جىلعى 9 قاڭتاردا قازاقستان رەسپۋبليكاسىنىڭ ەنەرگەتيكا ءمينيسترى الماسادام ساتقالييەۆ پەن جاپونيانىڭ ەكونوميكا، ساۋدا جانە ونەركاسىپ ءمينيسترى كەن سايتومەن ەنەرگەتيكالىق وتكەلدەردى وتكىزۋ اياسىنداعى تومەنكومىرتەكتى دامىتۋ جانە ءوزارا ءىس-قيمىل سالاسىنداعى ىنتىماقتاستىق تۋرالى مەموراندۋمعا قول قويدى، دەپ حابارلايدى Almaty-akshamy.kz ەنەرگەتيكا مينيسترلىگىنە سىلتەمە جاساپ.
قۇجات پاريج كەلىسىمىنىڭ ماقساتتارىنا سايكەس كەلەتىن ەنەرگيا رەسۋرستارى مەن تەحنولوگيالارىن، سونىڭ ىشىندە ەنەرگيانى ۇنەمدەۋ جانە جاڭارتىلاتىن ەنەرگيا كوزدەرىن پايدالانا وتىرىپ، ءوزارا ىنتىماقتاستىقتى نىعايتۋعا باعىتتالعان.
قازاقستان رەسپۋبليكاسىنىڭ ەنەرگەتيكا ءمينيسترى قازاقستان مەن جاپونيا ۋران، مۇناي جانە گاز ءوندىرۋ سالاسىندا ءقازىردىڭ وزىندە تابىستى ىنتىماقتاستىققا قول جەتكىزگەنىن، سونداي-اق جاپوندىق ەنەرگەتيكالىق تەحنولوگيالارى ەنگىزىلىپ جاتقانىن اتاپ ءوتتى.
تاراپتار ەنەرگەتيكا سالاسىندا، ونىڭ ىشىندە ەلەكتر ەنەرگەتيكاسى جانە جاڭارتىلاتىن ەنەرگيا كوزدەرى سالاسىندا بىرلەسىپ جۇزەگە اسىرۋ ءۇشىن الەۋەتتى جوبالاردىڭ تىزبەسىن قالىپتاستىرۋ تۋرالى كەلىسىمگە كەلدى. سونىڭ ءبىرى – «قازاقستان رەسپۋبليكاسىنداعى اككۋمۋلياتورلىق ەنەرگيانى ساقتاۋ جۇيەسىن پايدالاناتىن 500 مۆت جەلەنەرگەتيكاسى جوباسى».
قازىرگى ۋاقىتتا قازاقستان رەسپۋبليكاسىنىڭ ۇكىمەتى ەكونوميكا سالاسىنا ينۆەستيسيا تارتۋ ءۇشىن تارتىمدى جاعدايلار جاساۋعا بارلىق قاجەتتى شارالاردى قابىلداۋدا. تاراپتار ەنەرگەتيكا سالاسىنداعى باسىم باعىتتار مەن تۇراقتى دامۋ ماقساتتارىن جۇزەگە اسىرۋداعى ىنتىماقتاستىقتى دامىتۋعا ۋاعدالاستى.