بۇل تۋرالى باس پروكۋرور بەرىك اسىلوۆ مالىمدەدى.
ءىىم كريمينالدىق پوليسيا بولىمشەلەرىنە ينتەرنەتتى باقىلاۋ، الەۋمەتتىك جەلىلەر مەن مەسسەندجەرلەردىڭ قازاقستاندىق پايدالانۋشىلارىن (الاياقتاردى) انىقتاۋ ءۇشىن زاماناۋي قۇرال-جابدىقتار مەن مامانداندىرىلعان باعدارلامالىق جۇيە ساتىپ الدى، دەپ حابارلايدى Almaty-akshamy.kz
«قازىرگى ۋاقىتتا جاۋاپتى مەملەكەتتىك ورگاندار كەشەندى شارالاردى جۇيەلى تۇردە جۇزەگە اسىرۋدا. اتاپ ايتقاندا، ىشكى ىستەر مينيسترلىگى كريمينالدىق پوليسيا بولىمشەلەرىنە ينتەرنەتتى باقىلاۋ، الەۋمەتتىك جەلىلەر مەن مەسسەندجەرلەردىڭ قازاقستاندىق پايدالانۋشىلارىن (الاياقتاردى) انىقتاۋ ءۇشىن زاماناۋي قۇرال-جابدىقتار مەن مامانداندىرىلعان باعدارلامالىق جۇيەنى ساتىپ الدى»، – دەدى بەرىك اسىلوۆ ءماجىلىس دەپۋتاتتارىنىڭ Mudarabah Capital كومپانياسىنا قاتىستى ساۋالدارىنا جاۋاپ بەرە وتىرىپ.
ول وتكەن جىلدىڭ باسىنان بەرى باس پروكۋراتۋرا قىلمىستىڭ بۇل تۇرىنە قارسى ناقتى شارالار قابىلداعانىن ەسكە سالدى.
«ۇيلەستىرۋ كەڭەسى وتكىزىلدى، ۆەدومستۆوارالىق جۇمىس توپتارى قۇرىلدى، ءىس-شارالار جوسپارلارى مەن ادىستەمەلىك قۇرالدار ازىرلەندى، ميكروكرەديتتەر بەرۋ قاعيدالارىنا وزگەرىستەر ەنگىزىلدى، تيپولوگياسى مەن ءوزارا ءىس-قيمىل جوسپارى قابىلداندى، قارجى پيراميدالارىنىڭ سىرتقى بەلگىلەرىنىڭ تىزبەسى انىقتالدى. مەملەكەت باسشىسىنىڭ جولداۋىندا ايتىلعان الاياقتىققا قارسى ءىس-شارالار قابىلداۋ تۋرالى تاپسىرماسىن ورىنداۋ ماقساتىندا بىرلەسكەن شارالار كەشەنى ازىرلەندى. وسىعان بايلانىستى جول كارتاسىنىڭ تارماقتارىن جۇزەگە اسىرۋ ءۇشىن باس پروكۋراتۋرا جانىنان ۆەدومستۆوارالىق جۇمىس توبى قۇرىلدى»، – دەپ قوستى باس پروكۋرور.
سونداي-اق، ونىڭ ايتۋىنشا ىشكى ىستەر مينيسترلىگىنىڭ بىلىكتى ماماندارىن دايارلاۋ ماقساتىندا، الاياقتىق جانە قارجى پيراميدالارى بويىنشا قىلمىستىق ىستەردى تەرگەۋ تاكتيكاسى مەن ادىستەرىنە باعىتتالعان ارنايى وقىتۋ باعدارلامالارى ازىرلەنگەن.
«پوليسيانىڭ اۋماقتىق بولىمشەلەرىندە وسى ساناتتاعى ىستەردى اشۋعا جانە تەرگەۋگە ماماندانعان تۇراقتى تەرگەۋ-جەدەل توپتارى قۇرىلدى. قارجى مونيتورينگى اگەنتتىگى ىقتيمال قارجىلىق پيراميدالاردى ەرتە انىقتاۋ مەحانيزمىن ەنگىزدى»، – دەدى بەرىك اسىلوۆ.