قازاقستان قارۋلى كۇشتەرىنىڭ اسكەري بورتى سوعىس جىلدارىندا قازا تاپقان جاۋىنگەرلەر – نيكولاي گۋروۆ، تولەگەن ۇركەربايەۆ جانە پەتر فومەنكونىڭ سۇيەكتەرىن ماسكەۋدەن نۇر-سۇلتانعا جەتكىزدى، دەپ حابارلايدى Almaty-akshamy.kz Inform.kz-كە سىلتەمە جاساپ.
«سۇراپىل سوعىستان ورالماي، حابار-وشارسىز كەتكەن ساربازدار مەن وفيسەرلەردىڭ ۇرپاقتارى ءالى كۇنگە دەيىن بابالارى جايلى حابار كۇتەدى. سوعىستا قازا تاپقان سوڭعى سارباز جەرلەنگەنگە دەيىن ىزدەۋ جالعاسا بەرمەك. ءبىز بىرلەسىپ اتقارىپ جاتقان جۇمىس جاستارعا اسكەري-پاتريوتتىق تاربيە بەرۋگە، قازاقستاندىق جاۋىنگەرلەردىڭ جانقيارلىعى مەن باتىلدىعى تۋرالى تاريحتى جادىمىزدا ساقتاۋعا بارىنشا ىقپال ەتەرىنە سەنىمدىمىن»، - دەدى ءراسىم بارىسىندا قورعانىس ءمينيسترى، گەنەرال-پولكوۆنيك رۋسلان جاقسىلىقوۆ.
مينيستر قازاقستاندىق جاۋىنگەرلەردىڭ سۇيەكتەرىن ىزدەستىرۋگە بەلسەنە قاتىسقانداردىڭ بارىنە العىس ءبىلدىردى. تولەگەن ۇركەربايەۆ – الماتى وبلىسىنىڭ ۇزىناعاش كەنتىنەن، پەتر ابراموۆيچ فومەنكو – قوستاناي وبلىسى التىنسارين اۋدانىنىڭ ششەرباكوۆكا اۋىلىنان، نيكولاي ماتۆەيەۆيچ گۋروۆ – الماتى قالاسىنان ەكەنى ناقتىلانعان. اتالعان وڭىرلەردە جاۋىنگەرلەردىڭ سۇيەكتەرىن قارسى الۋ، تۋىستارىنا بەرۋ جانە اسكەري قۇرمەت كورسەتىلىپ، قايتا جەرلەۋ راسىمدەرى وتەدى. ايتا كەتەيىك، شارا ۇيىمداستىرۋشىسى - «Atamnyn Amanaty» قوعامدىق بىرلەستىگى. ول قازاقستاننان ءىى دۇنيەجۇزىلىك سوعىسقا اتتانىپ، قازا تاپقان جانە حابارسىز كەتكەن ساربازداردىڭ جەرلەنگەن جەرىن انىقتاۋ بويىنشا مۇراعاتتىق-ىزدەستىرۋ جۇمىستارىمەن اينالىسادى.
«سۇراپىل سوعىستىڭ باستالعانىنا سەكسەن جىلدان استام ۋاقىت ءوتتى. ءبىزدىڭ ۇيىم بۇل رەتتە مۇراعات دەرەكتەرىن جيناۋدا تىنىمسىز جۇمىس ىستەپ كەلەدى. جەڭىس جولىندا ءبىزدىڭ جارقىن بولاشاعىمىز ءۇشىن قازا تاپقانداردىڭ ەسىمدەرى انىقتالىپ، ولار ىزدەۋشىلەرمەن ۇنەمى بايلانىستا بولادى»، - دەدى «Atamnyn Amanaty» قب باسقارما ءتوراعاسى مۇرات مولداعالييەۆ.