بۇگىن ەلوردادا پرەمەر-مينيستردىڭ ورىنباسارى – قارجى ءمينيسترى ەرۇلان جاماۋبايەۆ حالىقپەن كەزدەسۋ بارىسىندا سالادا اتقارىلىپ جاتقان جۇمىستاردى ءتۇسىندىردى، دەپ حابارلايدى Almaty-akshamy.kz Inform.kz-كە سىلتەمە جاساپ.
]كەزدەسۋ بارىسىندا مەملەكەتتىك اپپارات قىزمەتىن جەتىلدىرۋ تۇرعىسىندا زاماناۋي سيفرلىق تەحنولوگيالاردى ەنگىزۋگە ەرەكشە ەكپىن قويىلىپ وتىرعانى ايتىلدى. مەملەكەتتىڭ بيۋدجەتتى جوسپارلاۋ راسىمدەرىن سيفرلاندىرۋعا ارنالعان ءتيىستى جوباسى جۇزەگە اسىرىلىپ جاتىر. كەيىنگى ەكى جىلدا ونىڭ ءبىرىنشى جانە ەكىنشى كەزەڭدەرى ىسكە اسىرىلدى. بۇل ءوز كەزەگىندە رەسپۋبليكالىق بيۋدجەتتى ەلەكتروندى تارتىپتە قۇرۋعا مۇمكىندىك بەردى. بيىل جىل اياعىنا دەيىن ستراتەگيالىق قۇجاتتار مەن رەسپۋبليكالىق بيۋدجەتتى قالىپتاستىرۋدىڭ بارلىق كەزەڭى تولىق كولەمدە سيفرلاندىرىلماق. سونىمەن قاتار، قارجى ءمينيسترى كەزدەسۋگە كەلگەن تۇرعىنداردىڭ سۇراعىنا جاۋاپ بەردى. وسى ورايدا، ۆەدومستۆو باسشىسىنا «قازاقستان حالقىنا» قورىنان بولىنگەن كومەك قاراجاتىنا قاتىستى ساۋال قويىلدى.
«اتاپ ايتقاندا، «قازاقستان حالقىنا» قورى اۋقىمدى جوبا ەكەنىن بىلەسىزدەر. مەنىڭ بىلۋىمشە، وندا 130 ملرد تەڭگەدەن استام قاراجات جينالدى. ونى قۇرۋ يدەلوگياسىنا توقتالساق، قورعا جينالاتىن جانە قوردان بولىنەتىن كومەك قاراجاتىنا سالىق سالىنبايدى. سوندىقتان، بۇل باعىتتا ەشقانداي سالىق سالۋ ءتارتىبى ەسكەرىلمەگەن»، - دەدى ە. جاماۋبايەۆ.
مينيستر قازىرگى كەزدە ۆەدومستۆوداعى جانە وڭىرلىك قۇرىلىمدارداعى قىزمەتكەرلەردىڭ جالاقىسىن كوتەرۋ جۇمىستارى ءجۇرىپ جاتقانىن ايتتى. كەزدەسۋ كەزىندە بيۋدجەتتىڭ اشىقتىعى، كادر ساياساتىن جەتىلدىرۋ جانە باسقا دا ماسەلەلەر كوتەرىلدى.