ياسساۋي كەسەنەسى اللەياسىندا كولىك ايداعان جۇرگىزۋشى جازالاندى

تۇركىستاندا كولىك جۇرگىزۋشىسى جاياۋ ادامدارعا ءقاۋىپ توندىرگەن.

تۇركىستان وبلىسىنىڭ پوليسەيلەرى الەۋمەتتىك جەلىلەرگە مونيتورينگ جاساۋ كەزىندە جول قوزعالىسى ەرەجەسىن بۇزعان جۇرگىزۋشىنىڭ بەينەجازباسىن انىقتادى. ول كولىك جۇرۋگە بولمايتىن قوجا احمەت ياساۋي كەسەنەسىنىڭ الدىنداعى اللەيادا Hyundai Sonata اۆتوكولىگىمەن ءجۇرىپ ءوتىپ، جاياۋ جۇرگىنشىلەرگە ءقاۋىپ توندىرگەن، - دەپ حابارلايدى اlmaty-akshamy.kz otyrar.kz ارناسىنا سىلتەمە جاساپ.

تۇركىستان پوليسيا باسقارماسىنىڭ قىزمەتكەرلەرى دەرەۋ ىزدەستىرۋ شارالارىن جۇرگىزىپ، كولىكتى ايداعان جاس جىگىتتى انىقتادى. ول ساۋران اۋدانىنىڭ تۇرعىنى بولىپ شىقتى.

«جۇرگىزۋشى كەسەنە ماڭىنداعى تاماقتانۋ ورنىنان شىعىپ، جول قىسقارتۋ نيەتىمەن زاڭدى بۇزعان. ول ءوزىنىڭ كىناسىن تولىق مويىنداپ، الداعى ۋاقىتتا قايتالامايتىنىن ايتقان»،-دەلىنگەن پوليسيا مالىمەتىندە. 

قازىرگى تاڭدا ق ر اكىمشىلىك قۇقىق بۇزۋشىلىق تۋرالى كودەكستىڭ 597-بابىنىڭ 2-بولىگى (كولىك قۇرالدارىن تروتۋاردا توقتاتۋ نەمەسە ونىڭ توقتاپ تۇرۋ قاعيدالارىن بۇزۋ، سونداي-اق كولىك قۇرالدارىن گۇلزارلاردا، كوگالداردا، بالالار نەمەسە سپورت الاڭدارىندا توقتاتۋ نەمەسە ونىڭ توقتاپ تۇرۋى) بويىنشا حاتتاما تولتىرىلىپ، كولىك ايىپتۇراققا قويىلدى.