2025 جىلعى قىسقى ازيا ويىندارىنىڭ رەسمي سايتى حاربيندە (جۇڭگو) بيلەتتەردى ساتۋدىڭ باستالعانىن حابارلادى.
ۇيىمداستىرۋ كوميتەتىنىڭ مالىمەتىنشە، بيلەتتەردى رەسمي سايتتىڭ "Tickets" بولىمىندە نەمەسە ارنايى بيلەت پلاتفورماسى ارقىلى ساتىپ الۋعا بولادى. سونداي-اق، WeChat قوسىمشاسى ارقىلى دا ساتىپ الۋ مۇمكىندىگى بار.
قازىرگى كەزەڭدە مۇز ۇستىندە وتەتىن بەس سپورت تۇرىنە ارنالعان بيلەتتەر قولجەتىمدى: حوككەي، كونكيمەن جۇگىرۋ، شورت-ترەك، مانەرلەپ سىرعاناۋ جانە كورلينگ. ەڭ قىمبات بيلەتتىڭ باعاسى 800 يۋاندى (57 634 تەڭگە)، ال ەڭ ارزانى 120 يۋاندى (8 645 تەڭگە) قۇرايدى. كەيبىر سپورت تۇرلەرى ءۇشىن ءارتۇرلى باعا ساناتتارى ۇسىنىلعان.
ايتا كەتەيىك، شاڭعى جارىسى، تاۋ شاڭعىسى، سكي-الپينيزمى، بياتلون جانە فريستايل-اكروباتيكا بويىنشا جارىستار شەكتەۋلى ورىندارعا بايلانىستى بيلەتسىز وتەدى.
حاربيندەگى ازيا ويىندارى 7-14 اقپان ارالىعىندا ۇيىمداستىرىلادى.