سوڭعى وتىرىستا رىسقالييەۆ ءبىرىنشى ايعاعىنان باس تارتقان بولاتىن
پروكۋرور لاۋرا اسانوۆا سوت تەرگەۋىن قايتا باستاۋدى ۇسىندى، دەپ حابارلايدى Almaty-akshamy.kz AtyrauPress-كە سىلتەمە جاساپ.
وعان سەبەپ سوڭعى وتىرىستا اتىراۋ وبلىسى مادەنيەت باسقارماسىنىڭ بۇرىنعى باسشىسى اقىلبەك رىسقالييەۆتىڭ باقىتگۇل حامەنوۆاعا قاتىستى كەلتىرگەن ايعاعىنان باس تارتۋى ەدى.
– رىسقالييەۆ سوڭعى ايعاعىندا وعان انتيكور قىزمەتكەرلەرىنەن قىسىم بولعانىن ايتتى. ونى انىقتاۋ ءۇشىن سول كەزدەگى جاۋاپ العان انتيكور قىزمەتكەرلەرى يزات مۇراتوۆ، ماقسات مۇراتوۆ پەن مۇرات نۇرمۇحانوۆتان ونلاين فورماتتا جاۋاپ العان ءجون دەپ ەسەپتەيمىن، – دەدى ول.
الايدا بۇعان ايىپتالۋشى تاراپتار كەلىسپەدى.
- قورعاۋىمداعى اقىلبەك رىسقالييەۆ ءوز ايعاعىندا انتيكور قىزمەتكەرلەرىنەن قىسىم بولعانىن ايتقانى راس. ءبىراق، ناقتى كىم ەكەنىن اتاعان جوق. وعان سول جەردەگى ادامداردىڭ كوپتىگى جانە سول ساتتەگى كوڭىل كۇيىنىڭ قالىپتى بولماۋى سەبەپ بولعان، – دەدى رىسقالييەۆتىڭ قورعاۋشىسى نۇرلان جولبولوۆ. – ءبىراق، انتيكور قىزمەتكەرلەرى مۇنى مويىندامايتىنى بەلگىلى. سوندىقتان، ولاردان جاۋاپ الىپ ۋاقىت وتكىزبەگەن دۇرىس دەپ ويلايمىن، – دەدى ادۆوكات.
دەگەنمەن، سوت پروكۋروردىڭ ءوتىنىشىن قابىل الدى. سوت ءتوراعاسى مەن ادۆوكاتتارعا ونلاين بايلانىس ارقىلى جاۋاپ بەرگەن كۋاگەرلەر رىسقالييەۆكە ەشقانداي قىسىم بولماعانىن، ونى ارنايى بەينەجازبالاردان كورۋگە بولاتىنىن اتاپ ءوتتى. ەندى سوت وتىرىسى ءبىر اپتادان كەيىن، ياعني، 27 قازان كۇنى جالعاسادى.
ايتا كەتەيىك، سوڭعى وتىرىستا رىسقالييەۆ ءبىرىنشى ايعاعىنان باس تارتقان بولاتىن. ايىپتالۋشىنىڭ ايتۋىنشا، وعان انتيكور قىزمەتكەرلەرى قىسىم كورسەتكەن.