اەس سالۋدى قولداۋ جونىندەگى حالىقتىق شتاب وكىلدەرى كەلەس اۋدانىندا ءوزىن-وزى جۇمىسپەن قامتىپ جۇرگەن تۇرعىندارمەن كەزدەسۋ وتكىزدى. كەزدەسۋگە «AMANAT» پارتياسىنىڭ تۇركىستان وبلىستىق فيليالى اتقارۋشى حاتشىسىنىڭ ورىنباسارى پولات تۇرسىنبايەۆ، اۋداندىق ءماسليحات ءتوراعاسى ن.شاۋلييەۆ جانە ءبىرقاتار ءماسليحات دەپۋتاتتارى قاتىستى.
كەزدەسۋ بارىسىندا پولات تۇرسىنبايەۆ كەلەستىكتەرگە رەفەرەندۋمنىڭ ماڭىزى، ەنەرگيا تاپشىلىعى ماسەلەسى، اتوم ەلەكتر ستانسياسىنىڭ ەلگە تيگىزەر پايداسى مەن ونىڭ قاۋىپسىزدىگى تۋرالى كەڭىنەن اقپارات بەردى. ول اتوم ەنەرگەتيكاسىنىڭ ەكونوميكالىق تۇرعىدان ماڭىزدى ەكەنىن اتاپ ءوتىپ، ەلىمىزدە ەنەرگيا تاپشىلىعى جىلدان-جىلعا ارتىپ كەلە جاتقانىن جەتكىزدى. قازاقستانداعى ەلەكتر ەنەرگياسىنىڭ 70 پايىزى كومىردەن، 20 پايىزى گازدان، 2 پايىزى كۇن، جەل جانە سۋ كوزدەرىنەن وندىرىلەتىنىن ايتتى.
«ەنەرگەتيكالىق ينفراقۇرىلىمىمىز ەسكىرىپ بارادى. ستانسيالاردىڭ 65 پايىزى توزعان. اسىرەسە، وڭتۇستىك ايماقتاردا ەنەرگيا تاپشىلىعى ايقىن سەزىلىپ وتىر. بۇل كاسىپكەرلىكتى دامىتۋعا ۇلكەن كەدەرگى كەلتىرۋدە. ەنەرگەتيكا سالاسىنداعى ماماندار اتوم ەنەرگەتيكاسى – وسى ماسەلەنى شەشۋدىڭ جالعىز جولى ەكەنىن ايتۋدا. حالىقتى الاڭداتىپ وتىرعان باستى سۇراق – قاۋىپسىزدىك. قازىرگى تاڭدا الەمدە 415 يادرولىق رەاكتور جۇمىس ىستەيدى، ولاردىڭ بارلىعى دامىعان ەلدەردە ورنالاسقان. ەگەر اەس ءقاۋىپتى بولسا، وركەنيەتتى ەلدەر بۇل تەحنولوگيادان باس تارتار ەدى. ءقازىر 60-قا جۋىق اەس سالىنۋدا، ونىڭ ىشىندە كورشىلەس وزبەكستان دا اەس قۇرىلىسىنا كىرىسىپ كەتتى»، – دەدى ول.
سونىمەن قاتار، پولات تۇرسىنبايەۆ قازاقستاننىڭ ۋران ءوندىرۋ بويىنشا الەمدە كوش باستاپ تۇرعانىن، ال ونىڭ قورى بويىنشا ەكىنشى ورىندا ەكەنىن اتاپ ءوتتى.
«دامىعان ەلدەر اەس-كە قاجەتتى شيكىزاتتى بىزدەن الىپ وتىر. يادرولىق وتىن وندىرەتىن زاۋىت تا وزىمىزدە بار. ءبىز بۇل رەسۋرستاردى ەل يگىلىگىنە پايدالانباساق، ونىڭ پايداسىن قاشان كورەمىز؟ ەكونوميكالىق تاۋەلسىزدىگىمىزدى نىعايتۋ ءۇشىن اەس سالۋ ماڭىزدى قادام»، – دەپ قوستى.
اەس قۇرىلىسىنا 2 مىڭ جۇمىسشى تارتىلاتىنىن جانە ستانسيا ىسكە قوسىلعاننان كەيىن 8 مىڭ جاڭا جۇمىس ورنى اشىلاتىنىن ايتتى. سونىمەن قاتار، اەس قۇرىلىسى ينفراقۇرىلىمدى دامىتۋعا دا سەرپىن بەرەتىنىن، بۇل جاڭا جولدار، مەكتەپتەر، اۋرۋحانالار جانە تۇرعىن ۇيلەر سالىنۋىنا مۇمكىندىك تۋعىزاتىنىن اتاپ ءوتتى.