الماتى قالاسىنىڭ ءبىلىم بەرۋ جۇيەسىن دامىتۋعا ارنالعان 2023–2030 جىلدارعا ارنالعان وڭىرلىك جول كارتاسى اياسىندا 2024 جىلدىڭ 3–24 قاراشاسى ارالىعىندا ارىپتەسىم، اۆتوكولىككە قىزمەت كورسەتۋ شەبەرحاناسىنىڭ مەڭگەرۋشىسى عابيت سوۆەتجانۇلىمەن بىرگە وڭتۇستىك كورەياعا ىسساپارمەن باردىق. ساپارىمىزدىڭ نەگىزگى ماقساتى – كورەيانىڭ زاماناۋي اۆتوكولىك تەحنولوگيالارىمەن، اتاپ ايتقاندا گيبريد جانە ەلەكتروموبيلدەردىڭ قۇرىلىمى مەن جوندەۋ ادىستەرىمەن تانىسۋ، تاجىريبە الماسۋ بولدى.
ءىسساپار بارىسىندا ءبىز KOOKGE Institute of Technology وقۋ ورنىندا تاعىلىمدامادان وتتىك. مۇندا زاماناۋي اۆتوكولىك وندىرىسىندەگى جاڭا تەحنولوگيالاردى زەرتتەپ، يننوۆاسيالىق جابدىقتارمەن جۇمىس ىستەۋ داعدىلارىمىزدى جەتىلدىردىك. سونىمەن قاتار، كورەيانىڭ جەتەكشى ءاۆتووندىرۋشى كومپانيالارىمەن بايلانىس ورناتىپ، ولاردىڭ زەرتحانالارىندا تاجىريبە جۇرگىزۋ مۇمكىندىگىنە يە بولدىق. بۇل ساپار بىزگە كورەيا اۆتوموبيل يندۋسترياسىنداعى سوڭعى ترەندتەر مەن دامۋ باعىتتارى تۋرالى قۇندى اقپاراتتار جيناۋعا جول اشتى.
سالىستىرا قاراعاندا، كورەيا اۆتووندىرىستە اۆتوماتتاندىرىلعان جۇيەلەر مەن وزىق تەحنولوگيالاردى كەڭىنەن قولدانادى. قازاقستاندا بۇل سالا ەندى عانا قارقىن الىپ كەلەدى. دەگەنمەن، ەلىمىزدە دە ەلەكترلى جانە گيبريدتى كولىكتەر وندىرىسىنە بەتبۇرىس جاسالىپ، جاڭا زاۋىتتار اشىلىپ جاتىر.
تاعىلىمداما بارىسىندا جيناعان ءبىلىمىم مەن تاجىريبەمدى الماتى ەلەكترومەحانيكا كوللەدجىندەگى ارىپتەستەرىممەن ءبولىسىپ، ستۋدەنتتەرگە زاماناۋي تەحنولوگيالاردى ۇيرەتۋ ارقىلى وقۋ ۇدەرىسىن جاڭا دەڭگەيگە كوتەرۋگە نيەتتىمىن. ەلەكتروموبيلدەر مەن گيبريد كولىكتەرگە قاتىستى ءبىلىمدى جەتىلدىرۋ – بولاشاق مامانداردىڭ باسەكەگە قابىلەتتىلىگىن ارتتىرۋدا ماڭىزدى ءرول اتقارادى.
تەحنيكالىق جانە كاسىپتىك ءبىلىم بەرۋ ۇيىمدارىنىڭ وقىتۋشىلارىنىڭ حالىقارالىق تاعىلىمدامادان ءوتۋى – قازاقستان رەسپۋبليكاسى پرەزيدەنتى قاسىم-جومارت توقايەۆتىڭ 2025 جىلدى «جۇمىسشى ماماندىقتار جىلى» دەپ جاريالاۋ باستاماسىمەن ۇندەسەدى. بۇل باعدارلاما ەلىمىزدەگى تەحنيكالىق ءبىلىم ساپاسىن ارتتىرۋعا باعىتتالعان. ءبىزدىڭ مىندەت – ستۋدەنتتەردى جاڭا تەحنولوگيالارمەن تانىستىرىپ، ولاردىڭ كاسىبي الەۋەتىن دامىتۋ.
ماەمگەنوۆ ساۋلەت،
«اۆتوموبيل كولىكتەرىنە تەحنيكالىق قىزمەت كورسەتۋ، جوندەۋ جانە پايدالانۋ» ماماندىعى بويىنشا الماتى ەلەكترومەحانيكا كوللەدجىنىڭ وندىرىستىك وقىتۋ شەبەرى