بۇگىن - حالىقارالىق جەر كۇنى. ايتۋلى داتاعا وراي ۇلىبريتانيادا ەكولوگيالىق ماسەلەلەرگە ارنالعان «Resolution» حالىقارالىق مۋزىكالىق جوباسى ۇيىمداستىرىلدى.
وعان ءبىزدىڭ ەلىمىز دە ءوز ۇلەسىن قوستى. ءانشى، قازاقستاننىڭ ەڭبەك سىڭىرگەن قايراتكەرى تامارا اسار قورشاعان ورتانى قورعاۋ تۋرالى ءاننىڭ قازاقشا نۇسقاسىن ورىنداپ، بەينەبايان ءتۇسىردى، دەپ حابارلايدى Almaty-akshamy.kz 24.kz-كە سىلتەمە جاساپ.
بۇل - «Resolution»، ياعني «شەشىم» ءانىنىڭ افريكالىق نۇسقاسى. ونى موزامبيك ەلىنىڭ اتاقتى ءانشىسى ستيۋارت سۋكۋما ورىندايدى. ال بۇل - بىرىككەن اراب امىرلىگى جاس انشىلەرىنىڭ بەينەبايانى. مىڭداعان ونەر ادامىنىڭ باسىن بىرىكتىرگەن جوبانىڭ ماقساتى ءبىر – عالامشارىمىزعا ءتونىپ تۇرعان كليماتتىق جانە ەكولوگيالىق قاۋىپكە بۇكىل الەم نازارىن اۋدارتۋ جانە ادامزات بالاسىن تابيعاتتى ايالاۋعا شاقىرۋ.
جاھاندىق باستاماعا ەلىمىز بيىل ءبىرىنشى رەت قاتىستى. قازاقستاننىڭ بىرىككەن كورولدىكتەگى ەلشىلىگى بريتانيالىق Tackroom Theatre كومپانياسىنىڭ ءوتىنىشى بويىنشا «Resolution» ءانىنىڭ نوتاسىن جانە اعىلشىن تىلىندەگى ءسوزى مەن قازاق تىلىندەگى جولما جول اۋدارماسىن ورىنداۋشىعا جولداعان. كيىز ءۇي، ۇلتتىق كيىم، دومبىرا مەن قوبىز ءۇنى. جوباعا ەلىمىزدىڭ اتىنان حالىق جانە ەسترادا اندەرىن زاماناۋي ناقىشتا ورىندايتىن قازاقستاننىڭ ەڭبەك سىڭىرگەن قايراتكەرى تامارا اسار قاتىسىپ، ءوز نۇسقاسىن ۇسىندى. قورشاعان ورتانى قورعاۋعا شاقىراتىن «جەر-انا» بەينەبايانىنا بالالار دا ءۇن قوسىپ، حورمەن ءان سالدى.
«قازاقستاندىق نۇسقا وتە كەرەمەت! ول جوبامىزعا ەرەكشە رەڭ بەردى دەسە بولعانداي. تامارا ەسىمدى عاجاپ ءانشى ءوزى عانا ەمەس، باسقا دا تالانتتى مۋزىكانتتار مەن بالالاردىڭ باسىن بىرىكتىرىپ، ءاننىڭ كەرەمەت نۇسقاسىن جاساي الدى جانە ءبىز وعان العىسىمىزدى بىلدىرەمىز»، - دەيدى «Resolution» جوباسىنىڭ ديرەكتورى ەببي رايت.
«مەن قۋانا-قۋانا قابىل الدىم. سەبەبى بۇل ءار ادامزات بالاسىنىڭ پارىزى، مىندەتى دەپ ەسەپتەيمىن. مەنىڭ دە، ءسىزدىڭ دە مىندەتىڭىز - وسى جەر شارىنا ءوز ۇلەسىمىزدى قوسىپ، ونى تازا ۇستاۋ»، - دەدى ءانشى، قازاقستاننىڭ ەڭبەك سىڭىرگەن قايراتكەرى تامارا اسار.
جوبانى پول ماككارتني، كيرا نايتلي جانە باسقا دا تانىمال جۇلدىزدار قولداپ وتىر. الەمنىڭ تۇكپىر-تۇكپىرىندە تۇسىرىلگەن مۋزىكالىق بەينەباياندار جيناعى ءىرى ەكولوگيالىق ۇيىمداردىڭ الەۋمەتتىك جەلىلەردەگى پاراقشالارى ارقىلى تاراتىلادى، بۇقارالىق اقپارات قۇرالدارىندا جانە بۇۇ-نىڭ كليماتتىڭ وزگەرۋى تۋرالى كونفەرەنسياسىنىڭ كەزەكتى سەسسياسىندا كورسەتىلەدى.